Ángeles Vázquez salienta o labor de GC Veterinaria a prol do benestar animal e pon en valor as iniciativas da Xunta para avanzar neste eido

O Goberno autonómico destina o próximo ano 1,35 millóns de euros a axudas a concellos, entidades protectoras e particulares para a protección dos animais de compañía

conselleira de Medio Ambiente e Cambio Climático, Ángeles Vázquez, e a delegada territorial da Xunta na Coruña, Belén do Campo, asistiron hoxe á inauguración no barrio de Xuxán da clínica GC Veterinaria, onde puxeron en valor o labor deste tipo de establecementos a prol do benestar dos animais de compañía. De feito, a conselleira destacou o especial compromiso desta entidade sen ánimo de lucro e colaboradora coa Asociación Protectora de Animais Gatocan, á que destinará os beneficios que obteña no desenvolvemento da súa actividade.
A responsable autonómica lembrou que este tipo de accións concordan coa aposta do Executivo galego polo benestar dos animais de compañía, como demostran os 1,35 millóns de euros que o seu departamento destinará o próximo ano a axudas a concellos, entidades protectoras e particulares para a súa protección.
A esta medida engádense outras como a construción do primeiro centro autonómico de protección animal, en Curtis (A Coruña), cun custo estimado de 2 millóns de euros e con capacidade para acoller 500 cans e gatos ou a pretensión de construír parques caninos nas grandes cidades galegas co fin de habilitar espazos específicos para o uso e benestar destes animais.