Fene despide o Ano Castelao cun mural e dúas representacións teatrais

A Casa da Cultura acollerá este venres ás oito a representación da obra Retrincos de Castelao

En decembro, Fantoches Baj levará a escea a peza Castelao, un corazón á intemperie

“Se aínda somos galegos é por obra e gracia do idioma”. Esta frase, recollida do álbum Sempre en Galiza de Castelao, preside o mural que loce desde hai uns días na fachada da Casa da Cultura de Fene. A cita, acompañada da silueta do escritor, debuxante e político, serve para homenaxear a un dos grandes intelectuais do noso país, símbolo da identidade galega e do compromiso coa nosa lingua e cultura.

Atentendo ao chamamento realizado aos concellos pola plataforma social Vía Galega, o goberno municipal de Fene acordou pintar o mural, de 5×3 metros, a carón da escaleira de acceso principal á Casa da Cultura de Fene. Con esta iniciativa, preténdese “poñer en valor a dimensión polifacética de Castelao e o seu pensamento político, filosófico e social, que o converten na figura máis relevante da Galiza do Século XX”.

Ademais do pintado dun mural, o Concello de Fene pechará este Ano Castelao con dúas representacións teatrais ao redor da figura do político e intelectual galego. Ámbalas dúas con entrada libre e de balde. Na primeira, prevista para este venres 31 de outubro ás 20 horas, a compañía Artefeito Producións representará a obra Retrincos de Castelao (espectáculo dirixido por Diego Rey, con Isabel Risco e Fran Rei sobre o escenario).

Nesta peza, “A partir da chegada de Zeltia ao cemiterio onde Pedro pasa os días, Isabel Risco e Fran Rei fan un divertido percorrido polo traballo e traxectoria vital de Castelao, recreando a súa enxeñosa e fascinante forma de ver a Galiza do seu tempo, un mosaico dunha sociedade e cultura galega atemporal, que nos antecede e nos outorga raíces. A través dun ollo de vidro que dá nova forma á realidade, visitaremos varias historias da obra literaria do xenio de Rianxo, como

A Luz, O fillo do Rosendo ou Peito de Lobo, sen esquecer as súas marabillosas viñetas e sempre coa retranca e humor que está presente no seu amplo e variado legado artístico”. Espectáculo recomendado para maiores de 12 anos.

Logo desta cita, o vindeiro 12 de decembro, no marco do Ciclo de Nadal que organiza a Concellería de Cultura, o salón de actos da Casa da Cultura acollerá ás 18.30 horas a representación da obra “Castelao, un corazón á intemperie”, a cargo da compañía Fantoches Baj.

Con esta producción, artellada para conmemorar o 75º aniversario da morte de Castelao, “tanto as máis pequenas como as súas familias poderán acceder dun xeito ameno e divertido á obra do autor así como a episodios da súa vida en Galicia e no exilio. Unha proposta que desde a memoria e a interpretación ofrece un espazo para homenaxear a un dos ilustres de Galicia e reivindicar o galego como lingua propia para pensar, para escribir e para relacionarnos co mundo que nos rodea”. Espectáculo para público familiar. Función organizada coa colaboración da Rede Cultural da Deputación da Coruña.