O Concello de Oleiros apoia a nova “marcha fúnebre” polo ensino público, inclusivo e de calidade convocada pola ANPA do CEIP Valle Inclán de Perillo

A Asociación de Nais e Pais do colexio Valle Inclán de Perillo convoca unha “marcha fúnebre”, o próximo domingo 26 de outubro, coa fin de reivindicar un ensino público, inclusivo e de calidade para as nosas crianzas. A andaina sairá ás 12:00 horas da zona da fonte no Parque Nelson Mandela e realizarase unha sentada pacífica na rotonda do Sol Y Mar.

Desde a ANPA Valle Inclán convócase a toda a comunidade educativa a participar este domingo 26 de outubro ás 12:00h na Marcha fúnebre polo ensino público, inclusivo e de calidade. Unha andaina reivindicativa que sairá do Parque Nelson Mandela e baixará a rúa Areal para rematar cunha sentada pacífica na rotonda do Sol Y Mar, cortando así o tráfico da N-VI.

Desde a ANPA alentan, aproveitando a época do samaín, a que os participantes adultos se acheguen vestidos de cor escura e a cativada con disfraces típicos desta festividade.

O Concello de Oleiros manifesta abertamente o seu total apoio ás xustas reivindicacións das ANPA do municipio a respecto da consecución de mellores servizos educativos públicos, de calidade e inclusivos para todos os nenos e nenas.

O Concello anima a toda a veciñanza a participar nestas reivindicacións tan importantes para o futuro de todas as crianzas.