O Concello de San Sadurniño distribúe algo máis de 24.000 euros entre oito entidades culturais e deportivas do territorio

• O Concello resolveu hai unhas semanas as axudas para entidades deportivas e esta mesma semana tamén as destinadas ás asociacións veciñais e culturais.
• O prazo de xustificación remata o 30 de novembro, aínda que pode solicitarse unha prórroga de ata 50 días máis no caso de que aínda non se completase a programación prevista.
• Entre axudas en concorrencia competitiva e subvencións nominativas, o Concello de San Sadurniño dedica neste 2025 case 73.000 euros a apoiar o tecido social e deportivo do territorio.

A Xunta de Goberno Local do Concello de San Sadurniño acaba de resolver a concesión das subvencións dirixidas a actividades culturais e conservación de instalacións por parte das asociacións veciñais e outros colectivos do municipio. Unha liña de achegas das que se beneficiarán as cinco entidades solicitantes -o Concello admitiu todas as peticións-, entre as que se distribuíron, con distintas contías, un total de 11.238,26€. Estas axudas súmanse á convocatoria de achegas para clubs deportivos, xa notificadas hai unhas semanas, que supuxeron un importe total de 13.000 euros. Neste caso as beneficiarias serán a UDC Narahío, o CF San Sadurniño e o Club fútbol-sala Santa Mariña do Monte. Tanto os colectivos relacionados co deporte como o veciñais e culturais teñen de prazo ata o 30 de novembro para presentar a documentación xustificativa das subvencións recibidas.

Malia que aínda hai máis dun mes de prazo para presentar as xustificacións, cabe a posibilidade de solicitarlle ao Concello a ampliación do prazo nun máximo de 50 días máis por causas debidamente xustificadas -que o Concello debe aceptar- naqueles casos en que aínda falten actividades ou investimentos por facer, como poden ser os relativos a programacións de Nadal ou doutro tipo.

A xustificación, en calquera caso, debe acompañarse das copias das facturas oficiais dos gastos efectuados (e TCs se se contratou persoal) e dos resgardos das transferencias correspondentes se os pagamentos superan os 100 euros. A suma de gastos debe ser, como mínimo, a da cantidade concedida máis o 20% do orzamento presentado na solicitude da convocatoria. 

Se se conta con outras axudas ademais da municipal -doutras administracións ou entidades privadas-, o importe para xustificar sairá de sumar todas as cantidades, incluída a subvención municipal, máis o 20% da axuda asignada nesta convocatoria.  Cómpre ter moi presente que, legalmente, o importe conxunto de todas as subvencións recibidas non poderá superar en ningún caso o dos gastos efectuados.

Nin en Cultura nin en Deportes se admitirán facturas referidas a gastos de comida. Porén, os colectivos veciñais e culturais si que poderán xustificar ata o 25% do orzamento total admitido con gastos relacionados coa compra de materiais funxibles necesarios para as actividades que organicen. Os clubes poden achegar como xustificantes tanto os correspondentes á súa participación en campionatos deportivos como os de funcionamento.

Tamén se deberá achegar toda a documentación impresa xerada -carteis, anuncios en prensa ou en redes sociais…- que acredite a participación municipal no financiamento das actividades. Os modelos de xustificación poden descargarse das ligazóns que hai ao pé desta información.

Para a convocatoria en concorrencia competitiva de actividades no eido da Cultura botaron solicitude cinco asociacións veciñais e culturais, todas elas admitidas. Nesta liña había consignados 11.000 euros dos cales se distribuíron finalmente 10.238,26, segundo as fórmulas e criterios estipulados nas bases e de acordo cos orzamentos subvencionables presentados, sen superar en ningún caso o límite de 4.000 euros de axuda.

Ademais, ás entidades con local en propiedade ou alugado teñen dereito a 1.000 euros fixos máis, que tamén deberán xustificar, para melloras de equipamento ou infraestrutura. Este ano só a percibirá  a asociación Adiante de Igrexafeita, dado que O Castelo de Narahío -a outra con local propio- non concorreu ás subvencións xerais por ter asinado convenio nominativo para o Festival do Río Castro.

Para a convocatoria de Deportes recibíronse tres solicitudes, todas elas admitidas, entre as que se distribuirán 13.000 euros,  primando aquelas disciplinas olímpicas cun maior número de fichas federativas.

Case 73.000 euros dedicados a apoiar o tecido social
O Concello dedica neste 2025 un total de 24.238,25 euros ás axudas en concorrencia competitiva para Cultura e Deportes. Porén, estas non son as únicas achegas coas que se apoia o tecido social que traballa no municipio, posto que a subvencións nominativas para actuacións concretas destínanse outros 48.500 euros, o que eleva a cifra total deste apartado a un total de 72.738,25 euros.

As beneficiarias de convenios son a Casa do Mel e a AGFA do Eume polo labor desenvolvido na zona da Cortiña e nas actividades relacionadas co sector primario; o Aldebarán e a EF Irmandiños para o sostemento das escolas de volei e fútbol, respectivamente; e a AVV O Castelo de Narahío, pola organización do Festival do Río Castro.

O alcalde, Secundino García Casal, puxo en valor “o elevado investimento municipal” en colaborar co tecido social e deportivo do municipio. “En proporción co noso orzamento e á poboación, seguimos á cabeza da comarca en fondos dedicados a axudarlles aos clubes deportivos e ás asociacións veciñais e culturais. Unha axuda que vai máis aló do económico, posto que todas elas saben que o Concello está sempre dispoñible para botar unha man na loxística dos eventos que organicen, publicitando os seus eventos, etc”.