Esta mañá arrincaron as tarefas para derrubar os peches da rúa Canceliña, unha actuación fundamental para acondicionar e remodelar, a posteriori, o novo parque do barrio

Veciñas e veciños do barrio da Agra do Orzán asistiron hoxe ao inicio dos traballos de demolición dos muros exteriores do parque do Observatorio, que arrincaron esta semana con actuacións no sector lindeiro á rúa Canceliña.

A alcaldesa, Inés Rey, puxo en valor esta intervención, “un avance histórico que nos permite dar un paso fundamental para dotar o barrio dunha nova área verde, longamente agardada polas persoas residentes na Agra e que, pouco a pouco, vai cobrando forma”.

A creación dun pulmón verde no barrio é, desde hai décadas, unha das principais demandas das veciñas e veciños. Polo compacto da súa configuración, a densidade urbanística da zona e a dificultade para atopar superficies baleiras ou carentes de uso, o acondicionamento dos terreos do Observatorio era unha actuación clave na folla de ruta do Goberno municipal, que obtivo en xuño a concesión demanial dos terreos da Axencia Estatal de Meteoroloxía (AEMET). Sen ter obtido este permiso administrativo por parte do Ministerio, o Concello non podería ter actuado.
“Tras conseguilo, este mesmo verán puxemos en marcha as accións necesarias para adecuar o soar. En primeira instancia, remodelando os peches interiores da Axencia, paso previo á demolición dos muros exteriores que, ata agora, impedían acceder ás zonas verdes”, indicou Rey, que lembrou que, en paralelo, o Concello xa está a traballar na definición do proxecto para acondicionar a superficie que se abrirá á cidadanía, así como os seus usos. A alcaldesa presenciou hoxe o desenvolvemento dos traballos nos muros, acompañada polo voceiro do Goberno municipal, José Manuel Lage, e veciños do barrio.

Esta mañá, a rexedora destacou o compromiso da veciñanza do barrio “mantendo firme unha demanda que consideramos xusta e necesaria”. Tamén agradeceu “a súa paciencia e comprensión, aínda sabendo que a creación do parque do Observatorio non era unha tarefa sinxela e que esixía acordos múltiples, non só a nivel interadministrativo senón tamén colaboracións con propietarios privados”.

O parque sumará 3.000 metros cadrados grazas ao convenio do soar das Adoratrices Sobre o papel, a concesión demanial obtida polo Concello permitirá contar con dúas superficies de terreo que contan con accesos ás rúas Canceliña e Gregorio Hernández, mais a extensión do parque será máis ampla. Isto será posible grazas á cesión gratuíta de máis de 3.000 metros cadrados dunha parcela lindeira ao parque, o antigo soar das Adoratrices.

Cómpre lembrar que o Pleno aprobou a finais de xullo o convenio urbanístico necesario para adoptar esta medida, que ademais de dar cumprimento a unha sentenza firme do TSXG —que recoñeceu como solo urbano consolidado unha parte da parcela do ámbito POL M-22, o soar das Adoratrices— permitirá aproveitar como área verde e espazo libre de uso público esa superficie de 3.000 metros cadrados, que, ademais, urbanizará a promotora que ostenta a titularidade deste ámbito.