O Concello inicia esta semana as obras no Centro Cívico de Labañou

O investimento supera os 700.000 €. A actuación inclúe a renovación da cuberta e lucernario, novas carpinterías e acristalamentos, mellora da recollida de pluviais, iluminación LED e ventilación na sala de usos múltiples

O Concello ten previsto iniciar esta semana as obras de reforma do Centro Cívico de Labañou, enmarcadas no Plan Municipal de Renovación dos Centros Cívicos. A Xunta de Goberno Local aprobou o proxecto cun investimento de 709.462,45 € e un prazo estimado de execución de catro meses, dentro dun paquete global de 1,58 millóns para Labañou, San Diego, O Castrillón e Os Rosales.

Esta actuación enmárcase na aposta do Goberno de Inés Rey por mellorar os equipamentos municipais e avanzar na modernización dos barrios, cunha clara vontade de reforzar a cohesión urbana e os servizos públicos de calidade en toda a cidade.

O obxectivo é mellorar a eficiencia enerxética e o confort do edificio a través de actuacións na súa envolvente e instalacións: substitución da cuberta metálica por paneis sándwich illantes e renovada claraboia, limpeza e reparación do aplacado de granito, reposición integral de ventás e acristalamentos con mellores prestacións, e optimización da recollida de augas con novos canalóns interiores e baixantes. Prevese, ademais, a reposición de falsos teitos e acabados afectados e a renovación do sistema de iluminación con tecnoloxía LED. A sala de usos múltiples incorporarase a un sistema de ventilación con recuperación de calor, e a central térmica pasará a gas natural para incrementar rendementos e reducir emisións.
“Falamos dun investimento que se traduce en mellor confort térmico, menos consumo e máis calidade de uso para a veciñanza”, indicou a concelleira Nereida Canosa.

Durante a execución poderán producirse episodios puntuais de ruído e delimitacións temporais de zonas exteriores, que estarán correctamente sinalizadas. O Concello agradece a comprensión da veciñanza e das persoas usuarias e lembrará os avisos operativos a través dos canais municipais durante todo o tempo que duren os traballos.

As obras no Centro Cívico de Labañou forman parte da primeira fase do Plan de Renovación da Rede de Centros Cívicos Municipais, que moderniza infraestruturas clave nos barrios para reforzar os servizos de proximidade, a accesibilidade e a eficiencia enerxética.