O Concello licita o novo PEMU, que actualizará os protocolos de emerxencia, adaptándoos ás novas tecnoloxías

O Plan de Emerxencia Municipal contará cun sistema de última xeración para conectar aos distintos equipos de emerxencias e seguridade da cidade

O Concello da Coruña licita a elaboración do novo Plan de Emerxencia Municipal (PEMU) co obxectivo de actualizar os protocolos de emerxencias establecidos e adaptalos ás novas tecnoloxías para conseguir unha maior eficacia na súa implantación.
“Cumplimos deste xeito co compromiso da nosa alcaldesa, Inés Rey, e actualizamos o PEMU para poder dar unha atención directa eficaz e áxil á cidadanía en diferentes situacións”, indicou a concelleira de Seguridade Cidadá, Montserrat Paz. A elaboración deste plan por parte dunha asesoría especializada terá un orzamento de 60.000 euros.

O novo Plan de Emerxencia Municipal contará un sistema común de última xeración que permitirá a interconexión dos distintos equipos de emerxencias e seguridade da cidade, así como outros servizos municipais, co obxectivo de dar unha resposta máis rápida e precisa ante calquera situación. Tamén se actualizarán os protocolos actuais para adaptalos a calquera tipo de circunstancia e aos distintos niveis de emerxencias que se poidan establecer na cidade. Por outra banda, o PEMU buscará que haxa unha mellor coordinación entre administracións.

Que é o PEMU

O PEMU é un documento de carácter técnico que recolle un conxunto de normas, medios dispoñibles, persoas e procedementos de actuación que deben ser a guía de resposta do Concello ás situacións de emerxencia que se poidan producir no mesmo. Neste sentido, son obxectivos esenciais do Plan de Emerxencia Municipal os seguintes:

O novo PEMU terá dúas vertentes, unha preventiva e de autoprotección, e outra claramente operativa, coas que se perseguen os seguintes obxectivos:

● Organizar as funcións básicas de Protección Civil a nivel do Concello da Coruña.
● Identificar e analizar os distintos riscos a nivel local.
● Determinar as medidas de prevención fronte aos riscos detectados.
● Coordinar todos os recursos municipais para proceder a dar unha resposta rápida en caso de emerxencia.
● Promover actividades de autoprotección corporativa e cidadá.
● Informar e concienciar á poboación sobre os riscos e medidas de protección.
● Integrar o PEMU da Coruña no Plan Territorial de Emerxencias de Galicia de acordo con as directrices marcadas por este último.