· Atletismo, artes marciais, fútbol 3×3 ou baloncesto son algunhas das múltiples disciplinas das que se poderá gozar en diferentes espazos da localidade
· Ese mesmo día celebrarase tamén a X edición do Torneo de Xadrez na praza Alcalde Segundo Durán
O deporte será o gran protagonista nas rúas da Pobra do Caramiñal este venres, 29 de agosto. Así o anunciaron o concelleiro de Deportes, Eloy Sobrido, e a coordinadora da área, Ana Romero, durante a presentación dunha nova edición do Día do Deporte na Rúa.
“Con esta iniciativa buscamos achegar o deporte á cidadanía e demostrar que hai actividades para todas as idades. É unha maneira de recoñecer o esforzo dos clubs e entidades que traballan todo o ano para manter unha oferta variada e de calidade”, destacou o edil.
Ao longo do día, desde as 11.30 ata as 14.00 horas e de 18.00 a 21.00 horas, diferentes espazos da localidade, como a praza Alcalde Segundo Durán, as pistas deportivas do Castelo ou a praia do Areal, acollerán actividades gratuítas e sen inscrición previa dirixidas a todas as idades. Entre as disciplinas que se poderán practicar atópanse o atletismo, artes marciais, fútbol 3×3, baloncesto, bádminton, remo, tenis, hóckey, tenis de mesa, voleibol, xadrez, parkour, ademais de inchábeis para os máis pequenos.
A iniciativa contará coa participación de representantes dos clubs locais, así como monitorado do departamento de Deportes, que se encargará de dirixir e dinamizar as diferentes actividades.
X Torneo de Xadrez
Ademais, no marco desta programación terá lugar o X Torneo de Xadrez na Rúa, que se celebrará de 16.30 a 19.00 horas na praza Alcalde Segundo Durán. O torneo disputarase baixo o sistema suízo a seis roldas, e as inscricións poderán realizarse a través do correo electrónico xadrezbretema@gmail.com
