A Xunta analiza con concellos da Coruña as medidas para reparar os danos causados polos incendios forestais en espazos protexidos

Ángeles Vázquez lembra que concellos e montes veciñais en man común poden solicitar axudas autonómicas para restaurar infraestruturas de uso público afectadas

A Xunta de Galicia abordou hoxe cos concellos da provincia da Coruña as medidas para afrontar a reparación dos danos causados polos lumes deste verán e o impulso de reformas que melloren a prevención. A conselleira de Medio Ambiente e Cambio Climático, Ángeles Vázquez, expuxo a posibilidade de solicitar axudas, dirixidas a entidades locais a montes veciñais, para restaurar infraestruturas de uso público que resultaran danadas en zonas da Rede galega de espazos protexidos e Reservas de biosfera.
Ángeles Vázquez presidiu unha reunión con representantes de medio cento entidades municipais da provincia coruñesa con espazos naturais incluídos en Rede Natura para analizar o proceso para a solicitude de compensacións polos danos ocasionados pola vaga de lumes forestais deste verán. O encontro contou tamén coa participación da delegada territorial da Xunta na Coruña, Belén Do Campo, e a directora xeral de Patrimonio Natural, Marisol Díaz, entre outros representantes da administración autonómica.
Responsables autonómicos e locais abordaron a liña de axudas que Medio Ambiente ten aberta para recuperar infraestruturas de uso público localizadas en espazos protexidos que abranguen desde a reposición ou reparación de elementos estruturais de sendas e rutas sinalizadas; pasando polo arranxo de infraestruturas e instalacións de interpretación do medio natural; e, por último, pola restauración de elementos de áreas recreativas.
Ante os asistentes, a titular de Medio Ambiente concretou que os montes veciñais en man común poden solicitar unha axuda por un importe máximo de 20.000 euros para afrontar este tipo de actuacións de reparación; mentres que os concellos teñen a posibilidade de optar a un máximo de 40.000 euros, neste caso, para subvencionar ata dúas actuacións.
Estes incentivos económicos para intervencións sobre o terreo en espazos protexidos compleméntanse coas achegas que a consellería ten previsto destinar a compensar aos titulares de Tecores para cubrir os gastos de sementeira de cereais en terreos afectados e para reparar e repoñer instalacións danadas (refuxios, comedoiros para animais, cercados…).
As dúas liñas de axudas están incluídas no paquete de medidas aprobado polo Goberno galego para impulsar a reconstrución das zonas afectadas polos lumes. Ángeles Vázquez reiterou o compromiso da Xunta para paliar os danos producidos pola vaga de incendios e lembrou que as liñas de apoio non teñen límite orzamentario.
Melloras en prevención
A reunión serviu para trasladar tamén aos responsables municipais as modificacións nos procedementos de autorización para actividades a desenvolver en Rede Natura. A titular de Medio Ambiente trasladou que se van simplificar a obtención dos permisos para facer rozas e queimas controladas.
En concreto, a Administración autonómica propón que, co correspondente permiso, se poidan facer lumes técnicos en Rede Natura entre marzo e maio. Tamén se elevarán os máximos de terreo que se pode rozar nos espazos protexidos baixo esta figura do 20% ao 30% da superficie de matogueira e o máximo no que se poden facer queimas pasará do 5% ao 10%.
A información facilitada por Medio Ambiente incluíu tamén a referencia ás facilidades que se queren introducir para que, por exemplo, as parcelas forestais sen aproveitamento non necesiten ningún tipo de autorización para volver ser cultivadas; así como que as talas necesarias para regresar ao uso agrícola non precisen avaliación ambiental nin outro papelame. Asemade, está previsto que os terreos que eran de uso agrícola non pasen automaticamente a uso forestal despois de 40 anos de abandono.
Os responsables da Xunta aproveitaron para coñecer de primeira man as inquedanzas dos representantes municipais respecto da situación derivada dos incendios que afectaron a algunhas zonas da provincia.