‘O principio de Arquímedes’, de Teatro do Atlántico leva cinco María Casares, incluídos o de director e mellor espectáculo. ‘Xardín suspenso’, do Centro Dramático Galego, leva tres
Os XX Premios de Teatro María Casares xa teñen gañadores. O Teatro Rosalía Castro da Coruña vén de acoller unha cerimonia de entrega na que un total de 14 espectáculos competían nas catorce categorías nas que se dividen os galardóns do teatro, organizados pola Asociación de Actores e Actrices de Galicia (AAAG). Á gala, que se retransmitiu en streaming polo web da TVG e por diferido na TVG2, acudiron máis de 500 convidados, entre profesionais do sector, asociados, xornalistas e convidados en xeral. Todos eles asistiron a unha gala ideada e conducida por Chévere, que neste ano propuxeron un musical festivo para celebrar as fortalezas do noso teatro e para homenaxear o centenario das Irmandades da Fala, o vixésimo cabodano da actriz María Casares e a vixésima edición dos premios. Xesús Ron dirixiu unha gala na que participaron un total de nove intérpretes (Patricia de Lorenzo, Miguel de Lira, Arantza Villar, Mónica García, Borja Fernández, Manuel Cortés, Cristina Iglesias, Marcos Ptt, César Goldi) e cinco músicos (Xacobe Martínez Antelo, Max Gómez, Manuel Cebrián, Xosé Miguélez e Javi GDJazz). Montse Dopico encargouse da lectura do Manifesto Galego do Día Mundial do Teatro e o Premio de Honra Marisa Soto foille entregado á Revista Galega de Teatro.
Ao longo da noite déronse a coñecer os gañadores dos Premios María Casares deste 2016. OS RESULTADOS:
O principio de Arquímedes: (5) adaptación-tradución, actor secundario, actor protagonista, director, espectáculo
Xardín suspenso: (3) iluminación, escenografía, actriz protagonista
O furancho: (1) vestiario
Manawee: (1) música orixinal
30 e tanto ósos: (1) texto orixinal
Ensaio sobre a cegueira: (1)maquillaxe,
Presidente: (1)actriz secundaria
Noiteboa: (1) actriz protagonista
FEO! (1): mellor espectáculo infantil
DISCURSO DA DIRECTIVA DA ASOCIACIÓN DE ACTORES E ACTRICES DE GALICIA (AAAG)
Vicente Mohedano, presidente da Asociación de Actores e Actrices de Galicia (AAAG), realizou no seu discurso un chamamento para que as institucións e a propia profesión se esforcen ao máximo en fortalecer un sector cultural de calidade. “Pedimos que a TVG, pola súa propia saúde, dedique o máximo esforxo en esixir da profesión teatral a máxima dedicación e excelencia no seu traballo. A TVG ten medios para promover este fin. Pedimos, ademais, que o Centro Dramático Galego que, pola súa propia saúde, dedique o máximo esforzo a esixir aos responsables da TVG a máxima dedicación e excelencia no seu traballo”, sinalou Mohedano. Tamén aproveitou a oportunidade para render homenaxe á actriz María Casares, no ano que conmemora o vixésimo aniversario do seu pasamento. “Como dicía María Casares, o público é o último actor do escenario. Sen el, o feito teatral, non existe. Viva o teatro, viva o público e viva María Casares!”, concluíu entre aplausos.
A GALA: DOUS GRANDES PANOS DE FONDO
Suso Montero encargouse un ano máis da escenografía, na que destacou a elaboración con gran precisión artística de dous enormes panos teatrais que serviron para a ambientación desta gala musical que lembrou a María Casares e ás Irmandades da Fala, como tamén a outros elementos que sirven para reivindicar unha identidade cultural propia aberta ao mundo e que constitúen unha mirada orgullosa ao pasado para afrontar con determinación o futuro do teatro, da lingua e da cultura galega. Con estes obxectivos en mente, ao escenario subiron nove actores (Patricia de Lorenzo, Miguel de Lira, Mónica García, Arantza Villar, César Goldi, Marcos Ptt, Manuel Cortés, Borja Fernández e Cristina Iglesias) e cinco músicos (Xacobe Martínez Antelo, Max Gómez, Manuel Cebrián, Xosé Miguélez e Javi GDJazz).
A gala, ademais, conta un ano máis coa produción executiva de Marta Horjales e co apoio dunha serie de institucións e entidades privadas que demostran coa súa implicación a importancia social e cultural que teñen os Premios María Casares. A Consellería de Cultura e Educación, a través da Axencia Galega das Industrias Culturais, o Concello da Coruña, a Deputación da Coruña, a Fundación AISGE e a Fundación SGAE patrocinan os premios, que contan coa colaboración tamén do Padroado de Cultura do Concello de Narón, a Televisión de Galicia, o Centro Dramático Galego, Gadis, Emsac e Trevisani.
GAÑADORES POR CATEGORÍAS
PREMIO ESPECTÁCULO COMPAÑÍA
1. MELLOR MAQUILLAXE
Raquel Fidalgo Ensaio sobre a cegueira Sarabela
2. MELLOR VESTIARIO
Marián Bañobre O furancho Ibuprofeno Teatro
3. MELLOR ESCENOGRAFÍA
Carlos Alonso Xardín suspenso Centro Dramático Galego
4. MELLOR ILUMINACIÓN
Afonso Castro Xardín Suspenso Centro Dramático Galego
5. MELLOR MÚSICA ORIXINAL
Monica de Nut, Vadzim Manawee Matrioshka Teatro
Yukhnevich e Javi Bermejo
6. MELLOR ADAPTACIÓN-TRADUCIÓN
Afonso Becerra O principio de Arquímedes Teatro do Atlántico
7. MELLOR TEXTO ORIXINAL
Diana Mera, Merche Pérez 30 e tanto ósos Aporía Escénica
e Teté García
8. MELLOR ACTRIZ SECUNDARIA
Iolanda Muíños Presidente Teatro do Morcego
9. MELLOR ACTOR SECUNDARIO
Alberto Rolán O Principio de Arquímedes Teatro do Atlántico
10. MELLOR ACTRIZ PROTAGONISTA (comparten premio ex aquo)
Mela Casa Noiteboa Redrum Teatro
Melania Cruz Xardín suspenso Centro Dramático Galego
11. MELLOR ACTOR PROTAGONISTA
Toni Salgado O principio de Arquímedes Teatro do Atlántico
12. MELLOR DIRECCIÓN
Xúlio Lago O principio de Arquímedes Teatro Do Atlántico
13. MELLOR ESPECTÁCULO INFANTIL
Feo! CARAMUXO TEATRO
14. MELLOR ESPECTÁCULO
O principio de Arquímedes TEATRO DO ATLÁNTICO
