Gonzalo Muíños denuncia o impago das horas extra da Policía Local desde o mes de novembro do pasado ano

§ Cualifica a situación de “inxustificable” e pedirá que se axilice o pagamento no vindeiro pleno municipal

§ Pide ademais que se impulse o proceso de selección para reforzar o cadro de persoal, dando cumprimento ao acordo de orzamentos asinado polos non adscritos co goberno local

Gonzalo Muíños cualifica de “inxustificable” que a Policía Local acumule desde novembro do 2024 o impago das horas extraordinarias realizadas. “Case un ano de horas extras sen aboar é o que acumula o goberno local cos axentes”, criticou, subliñando o malestar que esta situación está a xerar nun cadro de persoal que continúa a realizar un esforzo adicional para garantir unha correcta prestación do servizo.

Muíños lembrou que os retrasos no pagamento das horas extraordinarias “lonxe de ser unha excepción, adoitan ser a norma neste e noutros servizos municipais”. Porén, advertiu de que no caso da Policía Local a situación agrávase pola falta de efectivos.
Con só 108 axentes en activo, o corpo vese obrigado a recorrer de forma habitual ás horas extras para poder cubrir as quendas ordinarias, atender eventos multitudinarios, dar resposta ás manifestacións habituais no municipio ou facer fronte a situacións de emerxencia.
“O certo é que as horas extras son fundamentais para garantir o correcto funcionamento do servizo ante o déficit estrutural de axentes que existe”, sinalou o concelleiro non adscrito. Neste sentido, Muíños anunciou que reclamará explicacións no próximo pleno tanto polos retrasos nos pagamentos como pola paralización dos procesos selectivos destinados a reforzar a plantilla. Lembrou que o acordo de orzamentos asinado polas concelleiras non adscritas co goberno local recollía o compromiso de ampliar o número de efectivos, tal e como figura na Oferta de Emprego Público de 2025, mais desde a súa publicación no mes de maio “non se coñecen avances”.
“O reforzo do cadro de persoal é imprescindible e urxente. Estamos a falar dun proceso longo que debería estar xa en marcha se realmente se quere dar unha solución a este déficit estrutural” recalcou Muíños que recoñece, en calquera caso, que este reforzo “aínda seguiría sen ser suficiente pero supón un primeiro paso”.