· A cita, na que participaron uns 600 corredores, foi o pistoletazo de saída ao XI Circuito de Carreiras Populares Barbanza Arousa.
David Gómez de la Fuente (do Club Deportivo Pinarium) e Sabela López Castelo (Club Ourense Atletismo) conquistaron, onte, a XVI Carreira Popular Concello da Pobra do Caramiñal. Ambos conseguiron as primeiras posicións na modalidade absoluta, cubrindo os oitos quilómetros de circuíto en 23:45 e 28:04, respectivamente.
Na carreira tomaron parte unhas 600 persoas divididas en diferentes categorías en función da súa idade. Así, houbo espazo para os máis pequenos e pequenas pero tamén para os maiores, con participantes desde os 5 anos e adultos de máis de 65 anos. A maiores, houbo unha categoría de Sapatilla inclusiva dirixida a persoas con diversidade funcional que reuniu a unha vintena de deportistas.
A da Pobra, organizada Concello, a Asociación de Atletismo e Deportes do Barbanza e a Federación Galega de Atletismo, foi o pistoletazo de saída ao XI Circuito de Carreiras Populares Barbanza Arousa.
A David Gómez de la Fuente seguíronlle Amadeo Chaves Abal (do Amadeo Abal Nutrición Deportiva), Pablo Fariña Otero (do Atletismo Narón), Yago Ignacio García Sainz e Francisco Javier Ascanio Baso. Na categoría feminina, Ainoa Iglesias Gontán (S.D. Compostela Atletismo) fíxose co segundo posto, Lara López Castro acadou o terceiro, Karyna Yevtushenko o cuarto e Sofía Otero Freaza (Comesaña Sporting Club) conseguiu a quinta posición.
