A delegada da Xunta participou na clausura deste obradoiro de emprego dual que contou cun apoio do Goberno galego de máis de 440.000 euros

A delegada da Xunta, Belén do Campo, acompañada polo alcalde da Laracha, José Manuel López Varela, participou na clausura do obradoiro de emprego dual A Laracha IX, no que se formaron a 20 persoas en carpintería e moble e pintura industrial en construción. A delegada destacou que este taller de emprego péchase despois de 9 meses, grazas a un investimento da Xunta de case 423.000 euros, no que as alumnas e alumnos realizaron tarefas de fabricación de mobiliario urbano de madeira, renovación de solos e distintas obras de pintura neste concello.

Concretamente, o alumnado levou a cabo diversas actuacións de interese social e utilidade pública, entre as que destacan a construción dunha caseta para socorristas na praia de Caión, a fabricación de mobiliario urbano, o peche do pavillón do IES Agra de Leborís, a renovación do revestimento do solo do obradoiro de carpintería do polígono Lendo, así como outras relacionadas co mantemento do paseo fluvial de Gabenlle, a pintura nos campos de fútbol da Laracha e Paiosaco e melloras no centro social de Paiosaco.
Belén do Campo destacou que “os obradoiros de emprego permiten dotar a nosa poboación activa de formación de calidade ao tempo que desenvolven un traballo produtivo de utilidade pública ou interese social, coa posibilidade de acreditalo a través dos certificados de profesionalidade”. “O obxectivo – incidiu – é seguir mellorando o emprego nos concellos galegos, especialmente nos do rural, adaptando a oferta formativa ás súas demandas e necesidades de contratación”. Neste senso, animou a todos os participantes a aproveitar a formación recibida para buscar traballo e incluso para iniciar o seu propio negocio “porque estades preparados para traballar nun sector que precisa, nestes momentos, de profesionais cualificados”, subliñou.
Obradoiros 24-25

A representante do Goberno autonómico informou que a comarca de Bergantiños conta, nesta convocatoria 24-25, con 2 obradoiros duais grazas a un apoio da Xunta de case 740.000 euros (A Laracha IX e o obradoiro Lubiáns, de Carballo-Coristanco).
Na provincia da Coruña están aprobados 23 obradoiros de emprego duais, grazas a un investimento de máis de 9 millóns de euros para formar 440 persoas sen traballo.
Finalmente, Belén do Campo subliñou que en toda Galicia os obradoiros de emprego duais supoñen un investimento por un importe de máis de 36 millóns de euros para un total de 87 accións deste tipo coas que se prevé beneficiar a máis de 1.700 persoas sen traballo.
Na convocatoria de 2024-2025, ofrecéronse 9 meses de formación con contrato de traballo e coa posibilidade de inserción posterior en empresas da contorna.
O alumnado, a maiores de formarse e realizar un traballo de interese público remunerado, obtén un certificado de profesionalidade. Tamén se lles abre a posibilidade de traballar nunha empresa do ámbito das materias impartidas por un mínimo de tres meses unha vez completada a formación, grazas aos incentivos que ofrece a Xunta.
Para acceder a estes obradoiros, priorizáronse as persoas con especiais dificultades de inserción: mulleres, vítimas de violencia de xénero, emigrantes retornadas, persoas que esgotaron as prestacións e subsidios por desemprego, desempregadas de longa duración, maiores de 45 anos, persoas que carecen de títulos universitarios e de FP de grao superior, entre outras. Teñen preferencia tamén as persoas discapacitadas ou as beneficiarias do tramo de inserción da renda básica de Galicia, así como as que solicitaran este servizo a través da súa demanda de emprego e, dentro destas, aquelas que teñan prevista a realización deste tipo de medidas no seu itinerario de inserción laboral.
A Xunta de Galicia encárgase no caso dos obradoiros duais de emprego, de financiar a formación profesional para o emprego (medios, materiais, contratación de persoal…), así como os custos salariais derivados dos contratos de traballo subscritos co alumnado.