O Fórum Metropolitano comeza o segundo semestr de 2025 cunha ampla programación escénica e audiovisual para todos os públicos

A nova tempada inclúe 13 espectáculos escénicos para público infantil e familiar, ciclos temáticos de cinema como o Festival Lóstrego ou “Os Ollos Abertos” e unha nova edición do Doc do Mes

O Fórum Metropolitano inicia este mes a programación correspondente ao segundo semestre de 2025 cunha proposta cultural diversa, pensada para todos os públicos e con especial atención ao público infantil.

O concelleiro de Cultura e Turismo, Gonzalo Castro, foi o encargado de presentar hoxe a nova tempada no propio equipamento municipal, acompañado de representantes do tecido cultural da cidade. Castro destacou a relevancia do Fórum como elemento de cohesión social e de acceso á cultura, e destacou “o exemplo de integración e dinamización que supón para o barrio”.

A programación escénica inclúe 13 espectáculos, agrupados en tres ciclos principais:
● Forumáxico desenvolverase durante as dúas primeiras fins de semana de setembro, con funcións os venres e sábados, e achegará ao público familiar espectáculos de maxia e humor. Participarán A Maga Fani, cun espectáculo surrealista que mestura ciencia e fantasía, e Mago Marco, coa peza Maxia para soñar, que convida a viaxar polos soños dun neno aspirante a mago. A programación complétase con outras funcións de maxia participativa, que mesturan malabares, música e humor escénico para todos os públicos.
● Todo Público: cinco espectáculos dirixidos a nenas e nenos de 4 a 12 anos, que combinan monicreques, teatro sen palabras, contacontos e propostas con música. Participan compañías como:
○ Caramuxo Teatro
○ Tanxarina
○ A Cova das Letras
○ Pablísimo
○ Sol do Outono
● Sen Numerar: novo ciclo dirixido a público xuvenil e adulto, en colaboración con Agadic, que ofrece cinco espectáculos de xéneros diversos e contidos actuais. Inclúe dúas pezas pensadas especialmente para mozos e mozas, sobre o uso das redes sociais e a estética na sociedade contemporánea: O escaparate e As Preciosas Ridículas, que ademais terán funcións específicas para institutos en horario escolar. O ciclo complétase con O Último Home de Manuel Cortés, As Preciosas Ridículas da compañía Arroz con Costra, Boa Sorte Mala Fama de Tarabela Creativa e A Luz do Día de Serea Teatro.
● Funcións escolares: como complemento, manterase a programación didáctica con representacións matinais os venres, destinadas ao alumnado de infantil, primaria e secundaria, con inscrición a través do portal municipal de educación.
As entradas para todos os espectáculos estarán dispoñibles a través de www.ataquilla.com, na billeteira da Praza de Ourense e tamén no propio Fórum Metropolitano desde unha hora antes do comezo das funcións.
No ámbito audiovisual, o Fórum reforza o seu papel como espazo de exhibición e reflexión crítica, con programación nas salas Marilyn Monroe e Fernando Rey.
● Do 3 ao 6 de setembro terá lugar o Festival de Cinema Fantástico “Lóstrego”, promovido pola Asociación Nordés, que ofrecerá longametraxes e curtametraxes, actividades infantís, coloquios e exposicións.
● Do 17 ao 20 de setembro terá lugar a VII edición do ciclo “Os Ollos Abertos”, promovido pola Asociación AIRE, centrado na emigración, o refuxio e os dereitos humanos. As proxeccións programadas son:
○ 17 setembro: Bidasoa, documental de Fermín Muguruza
○ 18 setembro: Code Inconnu, de Michael Haneke
○ 19 setembro: L’histoire de Souleymane, de Boris Lojkine
○ 20 setembro: Non Other Land, de Yuval Abraham, Basel Adra, Hamdan Ballal e Rachel Szor
● O 4 de setembro arranca tamén o ciclo “Docs do Mes”, co documental Miralles, un arquitecto en diálogo co tempo, de Maria Mauti.
● Durante o mes proxectaranse varias estreas internacionais en versión orixinal, entre as que destacan:
○ Armand (A titoría), de Halfdan Ullmann Tondel (Noruega, 2024) – 11, 12 e 13 de setembro
○ Vogter (Condenados), de Gustav Möller (Dinamarca, 2024) – 25, 26 e 27 de setembro
○ Bon voyage Marie, de Enya Baroux (Francia, 2025) – 5 e 6 de setembro
○ Hard Truths (A miña verdade) – tamén nos días 11, 12 e 13 de setembro, na Sala Fernando Rey

O Fórum Metropolitano consolídase como un espazo clave na programación cultural municipal, cunha proposta que combina entretemento, reflexión e formación para públicos de todas as idades. A nova tempada enmárcase na liña de apoio á cultura e á creación local que vén desenvolvendo o Goberno de Inés Rey ao longo do mandato, cunha clara aposta pola diversidade de formatos e a accesibilidade da programación nos distintos equipamentos da cidade.

Toda a información detallada sobre a programación do cinema e das artes escénicas no Fórum Metropolitano durante o segundo semestre de 2025 pode consultarse no portal
municipal de cultura: Programación segundo semestre do Fórum Metropolitano.