A biblioteca municipal de Neda recupera dende este martes o seu horario de mañá e tarde

Coincidindo co arranque do curso escolar en Neda (hoxe é festivo local), a biblioteca municipal deixará atrás o seu horario de verán. A partir deste martes, as instalacións culturais estarán operativas máis tempo e recuperan, como é costume, a xornada de mañá e de tarde.
O espazo, peza central da oferta da Casa da Cultura, abrirá a partir de agora, de luns a venres, de 9 a 13 e de 17 a 20 horas (o pasado curso pechaba os venres á tardiña). Neste tempo estarán dispoñibles para a lectura e estudo tanto a sección infantil como a de adultos e, por suposto, estarán operativos os servizos de préstamo en sala e a domicilio.
Nos próximos días está previsto que a biblioteca municipal- a cuarta en Galicia por volume de préstamos bibliotecarios por cada 1.000 habitantes, segundo un estudo da Rede de bibliotecas públicas- recuperará ademais a súa programación habitual de actividades de dinamización, entre as que cómpre destacar, as reunións do seu frutífero club de lectura.