Todas as solicitudes presentadas para o programa Concilia de cara o curso 2024-25 están admitidas. Son un total de 202 (21 máis que o curso pasado): 97 para o colexio Bergantiños, 81 para o Fogar e 24 para o Gándara-Sofán.
No resto dos centros públicos de primaria non se implantará o servizo, xa que non houbo solicitantes. Desde a Concellaría de Servizos Sociais, Igualdade e Sanidade ofrécese a posibilidade de poñer en marcha o servizo en todos os centros públicos de infantil e primaria sempre que exista un mínimo de 10 peticións para o curso completo.
Das 202 solicitudes recibidas no prazo ordinario, 162 foron para o curso completo e 40 para días soltos. A partir do mes de outubro, e durante todo o curso, estará aberto o segundo prazo de matrícula, tanto para usuarios/as habituais coma para días soltos.
O programa Concilia é un recurso que poñemos a disposición das familias desde o Concello de Carballo para facilitar a conciliación da vida familiar e laboral. O programa desenvólvese durante todo o período escolar, e permite que as familias poidan deixar aos nenos e nenas no colexio a partir das 07.00 h. Deste xeito tratamos de responder ás necesidades familiares derivadas do desfase existente entre os horarios escolares e laborais.
O servizo inclúe actividades de ocio e tempo libre dirixidas por un equipo de monitores/as, e a opción dun almorzo saudable para as familias que o precisen. Tamén está dispoñible en períodos vacacionais, agás no verán, na sede da empresa concesionaria, O Recuncho dos Nenos (rúa Barcelona, 18, entrechán dereito).
No documento anexo poden consultarse as bonificacións concedidas.
Deja un comentario
Lo siento, debes estar conectado para publicar un comentario.