O profesor Juan Manuel Monterroso fixo unha visita guiada
Unha visita guiada polo decano da Faculdade de Xeografía e Historia da Universidade de Santiago de Compostela, Juan Manuel Monterroso Montero, serviu para marcar o arranque da exposición no Museo do Gravado de Artes da colección completa dos Caprichos de Goya reinterpretados por Salvador Dalí.
Nun evento que contou entre outros coa presenza do director da fundación Museo de Artes, Manuel Ruiz Rivas, e do senador José Luis Torres Colomer, o profesor universitario foi desentrañando as claves dos distintos gravados (80 en total, repartidos en dúas salas) para poder interpretar e entender os detalles que Dalí engadiu sobre a serie orixinal: uns traballos que lle ocuparon entre os anos 1973 e 1977 e nos que o creador de Figueres proxecta os seus medos e fantasías.
Parte desta colección viaxou o ano pasado a Estados Unidos, onde colleitou gran éxito de público na súa exhibición nas cidades de Nova York, Chicago e Miami. Agora, ofrécese a posibilidade aos espectadores desta parte do Atlántico de poder contemplala na súa integridade ata o mes de maio.
