O Concello pon a punto tres camiños tras a “escoita activa” das solicitudes veciñais

· O alcalde, José Carlos Vidal, e a concelleira de Obras, Patricia Lojo, comprobaron o resultado dos traballos, acometidos en Figueira, Xunqueiras e Roupión.

Froito da escoita activa á veciñanza, o Concello acaba de concluír o arranxo de tres camiños situados nas parroquias de Caramiñal, O Xobre e Lesón. En todos os casos, as actuacións realizáronse, directamente, a partir das demandas das persoas residentes nestas zonas, e supuxeron a mellora e acondicionamento do estado destas vías municipais.

O alcalde, José Carlos Vidal, e a concelleira de Obras, Patricia Lojo, visitaron os tres lugares para comprobar o resultado dos traballos, concluídos recentemente. Tanto o rexedor como a edil responsable da área de Obras inciden na importancia destas intervencións que “malia ser obras menores, son o resultado do contacto directo e da escoita activa á cidadanía”.

En concreto, os camiños sobre os que se actuou foron os do lugar de Figueira (Caramiñal), o de Xunqueiras (O Xobre) e un de Roupión (na parroquia de Lesón). Trátase de vías que se atopaban en mal estado de conservación e que presentaban deficiencias como fochancas e afundimentos ou problemas en canto á drenaxe da auga. As actuacións do Concello permitiron subsanar esas problemáticas reforzando, ademais, a seguridade viaria.

A previsión, tal e como avanzaron o rexedor e a concelleira, é “continuar con esta liña de traballo, executando labores similares noutros puntos do termo municipal, actuando naqueles camiños en peor estado de conservación “.