O Concello emite a aprobación provisional do Plan Especial del Río Maior

· O expediente enviouse á Dirección Xeral de Urbanismo da Xunta de Galicia para proceder posteriormente á súa aprobación definitiva.

· Este proxecto permitirá a construción do Paseo Fluvial del Río Maior e a creación dunha serie de colectores para completar a rede de saneamento da parroquia de Lubre.

· Ademais, incluiranse solucións para minimizar os efectos do risco de inundación en dous puntos do ámbito.

O Concello de Bergondo emitiu a aprobación provisional do Plan Especial del Río Maior, na parroquia de Lubre, un proxecto que supoñerá a construción do Paseo Fluvial del Río Maior e permitirá completar a rede de saneamento da zona.

O expediente enviouse á Dirección Xeral de Urbanismo da Xunta de Galicia para o seu visto e prace e proceder posteriormente á súa aprobación definitiva, previa á licitación dos traballos.

A través deste Plan deséñase, en primeiro lugar, unha senda que comunica os lugares de Agrumias e Cambade, na parroquia de Lubre, nun tramo de aproximadamente 2.184 metros de lonxitude. Este carreiro fluvial, que se executará en madeira laminada de piñeiro tratado, supoñerá un novo espazo de lecer para os veciños e veciñas da zona, servindo ademais como atractivo turístico.

En segundo lugar, construiranse tres colectores de saneamento para completar a rede de augas residuais da parroquia, formada por outros sete colectores que xa están executados, e permitindo a posta en servizo desta infraestrutura coa condución das augas residuais á EDAR de Gandarío.

Ademais, procederase á restauración ambiental do ámbito xa que presenta unha certa degradación pola presión construtiva que sufriu e incluiranse solucións para minimizar os efectos do risco de inundación en dous puntos.