Anxo M. Lorenzo salienta na Coruña a importancia das Feiras do Libro como instrumento inclusivo e dinamizador da lectura

— O director xeral de Cultura participa na inauguración desta cita que se impulsa en colaboración coa Federación de Librarías de Galicia e que percorre 13 vilas e cidades galegas ata finais deste mes de agosto

— Os xardíns de Méndez Núñez acollerán ata o domingo 10 de agosto máis de 300 actividades entre as que se inclúen espectáculos, presentacións, sinaturas de libros, faladoiros e obradoiros inclusivos

 

O director xeral de Cultura, Anxo M. Lorenzo, participou hoxe na inauguración da Feira do Libro da Coruña, a décima parada do circuíto impulsado pola Consellería de Cultura, Lingua e Xuventude e a Federación de Librarías de Galicia, onde destacou o papel fundamental que supoñen estas propostas de cara ao impulso e dinamización da lectura para todas as idades, así como tamén a inclusión de todos os colectivos da sociedade.

O representante da Xunta de Galicia puxo en valor “estas iniciativas, que axudan ao descubrimento de novos autores, xéneros literarios e lecturas, ao tempo que enchen as cidades e vilas de propostas culturais de diferentes tipos e para todos os públicos”. Así mesmo, Anxo M. Lorenzo agradeceu e destacou o traballo dos axentes implicados na organización da feira que contará cunha programación ampla e variada de 36 librerías participantes e máis de 300 actividades, entre as que se inclúen as sinaturas de libros de preto de 250 autores, presentacións, obradoiros infantís, faladoiros, rutas, recitais e máis de 10 espectáculos para toda a familia, incluíndo concertos, obras de teatro, contacontos en lingua de signos ou para adultos.

Neste senso, o director Xeral de Cultura remarca esta iniciativa dentro “do compromiso do Goberno Galego por impulsar e dinamizar a lectura, o sector libreiro e os grandes escritores e escritoras da nosa comunidade, así como tamén fomentar as nosas letras”, ademais de “achegar a cultura a toda a poboación galega, favorecendo a súa inclusión ao abeiro da Lei de cultura inclusiva”.
Baixo o lema Onde florecen os libros, esta feira foi inaugurada coa lectura do pregón a cargo da poeta Lucía Aldao, e permanecerá aberta ao público ata o domingo 10 de agosto, de 11 a 14 horas e de 17,30 a 21,30 horas.
Tres feiras por diante
A Coruña é a décima das 13 citas co libro e a lectura que terán os galegos e galegas en diferentes vilas e cidades das catro provincias. Tras iniciar o percorrido en Ferrol e pasar xa por Santiago de Compostela, Lugo, O Porriño, Redondela, Ourense, Vigo, Ponteareas e Rianxo, a Feira do Libro chega agora á Coruña ata o 10 de agosto.

As tres Feiras do Libro que quedan son neste mesmo mes de agosto en Viveiro, do 12 ao 15; Foz, do 16 ao 19, e, finalmente, en Monforte de Lemos, do 20 ao 23.

Esta feira, que pode visitarse nos xardíns de Méndez Núñez, enmárcase dentro da campaña estival Para gustos, cultura, unha iniciativa impulsada desde a Xunta de Galicia para encher o verán dunha oferta cultural diversa e de calidade que se desenvolverá en máis de 200 concellos de Galicia con máis de 3.400 actividades de 40 tipoloxías distintas.