O Concello reivindica o valor natural e cultural do río das Pedras con dúas rutas turísticas

Serán este sábado, 26 de xullo, e o xoves, 14 de agosto, ás 10.00 horas.

 

A riqueza natural e cultural do río das Pedras fan deste espazo un dos maiores reclamos turísticos da Pobra do Caramiñal. O Concello buscará pór en valor esta contorna con dúas rutas turísticas que correrán a cargo do xeógrafo e guía oficial de Turismo de Galicia, Joaquín Rubal. As actividades están encadradas dentro do programa estival da Concellería de Turismo, e levaranse a cabo este sábado, 26 de xullo, e o xoves, 14 de agosto.

En ambos casos, as saídas arrincarán ás 10.00 horas e terán unha duración estimada de tres horas. Ao longo das mesmas, as persoas participantes realizarán un percorrido a pé de, aproximadamente, dous quilómetros. A dificultade da ruta é media-alta, polo que está recomendada para persoas maiores de 12 anos.

O punto de encontro será a Casa Mariñeira e, desde alí, os visitantes partirán en microbús ata o lugar desde onde comezarán a ruta. Ao remate do itinerario, serán trasladadas en autobús ata o miradoiro de Valle-Inclán, situado na Curota, para gozar dunha das panorámicas máis emblemáticas da comarca.

As persoas interesadas en anotarse nas distintas propostas poderán facelo na Casa Mariñeira ou no correo turismo@apobra.gal. Así mesmo, poderán solicitar máis información nos teléfonos 671 090 262, no 687 482 835 ou no 981 843 280 (extensión 2035).