A Pobra descobre aos turistas o marisqueo a pé, un dos oficios tradicionais de maior importancia no municipio

As explicacións corren a cargo das traballadoras da Asociación Mar da Pobra, que fan unha explicación teórica e práctica do seu traballo.

As seguintes propostas terán lugar o mércores, 23 de xullo, e o xoves, día 31.

 

O marisqueo tradicional é, sen dúbida, unha das actividades económicas máis importantes da Pobra. E é tamén o fío condutor dunha das actividades imperdibles na programación turística estival. Da man das mariscadoras da Asociación Mar da Pobra, as persoas que participan nesta actividade teñen a oportunidade de coñecer, de xeito teórico e práctico, este oficio tradicional. O Concello ten aberto o prazo de inscrición das próximas propostas, que se celebrarán o mércores, 23 de xullo (na praia de Raposiños), e o xoves, día 31 (en Areos).

 

A concelleira de Turismo, Estefanía Ramos, sinala que se trata dunha “experiencia inmersiva coa que se busca poñer en valor este oficio con tanta tradición e historia na Pobra e ofrecer, ademais, unha alternativa diferente aos visitantes”.

 

Teoría e práctica

O punto de encontro é a Casa Mariñeira e desde alí, o grupo sae cara ao areal, onde as traballadoras realizan os labores de marisqueo a pé. Grazas ás súas explicacións, os e as turistas poden descubrir en que consiste este traballo, como é a xornada laboral destas mulleres e aprenden, ademais, a identificar entre as distintas especies que recolectan. A experiencia vai máis aló da teoría, xa que as persoas participantes teñen a ocasión de empregar os distintos utensilios de marisqueo como o rastro e o sacho.

 

Estas sesións están englobadas dentro do programa municipal de turismo mariñeiro. Ademais de en xullo, as actividades de marisqueo a pé celebraranse os xoves 7, 14, 21 e o venres, 29 de agosto.

 

As persoas interesadas en anotarse poderán facelo na Casa Mariñeira (parque do Castelo) ou no correo turismo@apobra.gal. Así mesmo, poderán solicitar máis información nos teléfonos 671 090 262, no 687 482 835 ou no 981 843 280 (extensión 2035).