Chile, a primeira delegación do Pacífico en asistir a un Encontro de Embarcacións Tradicionais en Galicia

Ao XVII Encontro de Embarcacións Tradicionais de Galicia, que se celebra en Ribeira até o domingo 20 de xullo, asiste por primeira vez unha delegación suramericana. Trátase dunha nutrida representación de carpinteiros de ribeira de Chile, comandada polo Servicio Nacional de Patrimonio Cultural do Goberno chileno, que chega a Galicia para presentar e compartir a súa cultura mariñeira.

O alcalde de Ribeira, como anfitrión e un dos tres organizadores do evento xunto con Culturmar e a Real e Ilustre Confradía da Dorna, organizoulles unha recepción oficial por tratarse da delegación que ven de máis lonxe, “o que supón un mérito excepcional”. Luís Pérez Barral salientou que o mar conecta moitas vilas e países e lembrou que Galicia sitúase “no centro do Atlántico. No medio entre Europa e América”. O rexidor local aproveitou a recepción para “abrirlle as portas da nosa casa coa esperanzaa de que este Encontro sirva para unir alianzas entre países e tradicións”.

Marco Tamayo foi o voceiro da delegación chilena. Tamayo, representante da Carpintería de Ribeira andina, explicou que para eles supón unha honra presentar neste Encontro “a nosa cultura marítima e estreitar os lazos con Galicia”. Os chilenos presentan a Ribeira unha embarcación típica do país, a “Chilota”, que foi construída o ano pasado na Factoría Albaola, en Pasaia (Guipúscoa). Ademais do patrimonio marítimo, a delegación chilena presenta tamén no XVII Encontro a “marraqueta”, un pan típico do país que van elaborar en vivo e en directo.

Pola súa banda, o presidente de Culturmar, Xosé Luís Sacau, explicou que a expedición chilena é a primeira delegación do Pacífico que chega a Galicia para participar nun Encontro. “Máis alá da espectacularidade dos barcos que se poderán ver estes días en Ribeira, este Encontro é fundamental para axudar na transmisión de valores e patrimonio”, engadíu.

Na recepción oficial, o Concello de Ribeira obsequiou á delegación de Chile cunha copia da carta náutica que o xeógrafo galego Domingo Fontán elaborou no século XIX e cun libro sobre a vila de Corrubedo “para que levedes un anaquiño de nós para Chile”. Pola súa banda, a delegación andina entregoulle ao goberno local unha réplica dunha embarcación prehispánica feita de rafia e elaborada de xeito totalmente artesanal.

Tras este acto institucional, os chilenos ofreceron no Pavillón do Patrimonio a conferencia titulada “Experiencias de salvagarda da carpintaría de Ribeira en Chile”, onde cinco carpinteiros de ribeira presentaron, no medio dunha gran expectación, a súa experiencia.