O Concello mellora a rede de pluviais en Pisón

· O proxecto definirá unha rede de pluviais para acabar cos problemas de escorrentías que sofren nas épocas de choivas máis copiosas os veciños e veciñas deste núcleo rural.

· O orzamento ascende a algo máis de 35.500 euros.

O Concello de Bergondo sacou a concurso as obras de mellora da rede de pluviais no núcleo de Pisón. As obras, orzadas en 35.504 euros, dan resposta a unha demanda dos veciños e veciñas desta aldea, que reclaman unha mellor rede #ante os problemas de escorrentía na plataforma que sofren especialmente durante as épocas de choiva.

O proxecto ten como obxectivo definir unha rede de pluviais propiamente dita, pois actualmente non existe na zona, que conta con varios tubos de formigón en zonas puntuais para dar continuidade ás cunetas nas marxes do vial que atravesa a localidade.

Deste xeito, prevese executar un colector principal ao que se conectarán os elementos dispostos para a drenaxe a través de arquetas. Complementariamente, renovaranse as zonas de estrada que se vexan afectadas por estes traballos.

O prazo de execución da obra é de dous meses desde o inicio da mesma.

Desde o goberno local sinalan que “a nosa prioridade é sempre mellorar a calidade de vida dos veciños e veciñas do noso municipio. Isto demóstrase con actuacións como esta, moi reclamada polos veciños e veciñas de Pisón, que contarán cunha rede de pluviais en condicións e esperemos acabar cos recorrentes problemas de escorrentías que padecen nas épocas nas que as choivas son máis intensas”.