O Mago Teto chega este xoves a Neda co espectáculo de ilusionismo “O Afiador”

Neda pon en marcha este xoves, 17 de xullo, unha nova edición do programa de lecer ao aire libre “Miúdo verán. Cultura en familia”. O espectáculo de ilusionismo “O afiador”, protagonizado polo Mago Teto, será o encargado de inaugurar a iniciativa, especialmente pensada para a xente máis nova da casa.

A contorna do albergue de peregrinos acollerá, a partir das 20 horas, o show, no que as historias dos afiadores-un oficio que tivo o seu apoxei nos séculos XVIII e XIX- que percorrían milleiros de quilómetros, coa única compaña da súa roda, chegan á escena coa axuda do ilusionismo.

O espectáculo xira ao redor dunha roda de afiar dos anos 30 herdada polo mago Teto dos seus devanceiros, e nel emprega para os seus efectos de maxia elementos típicos dos afiadores (coitelos, tesoiras, navallas, paraugas…)

A proposta chega a Neda, no marco do programa Cultura no Camiño, co que o Agadic busca contribuír á dinamización cultural das localidades polas que pasan as diferentes rutas xacobeas nos meses de maior afluencia de peregrinos e visitantes.