Máis de 150 rapaces e rapazas participaron nos campamentos de verán dos Concellos de Boqueixón e Vedra

Máis de 150 rapaces e rapazas desfrutaron dos Campamentos de Verán 2025, organizados polos Concellos de Boqueixón e Vedra. Así, os máis novos, entre os 9 e os 11 anos, gozaron de catro días de ximcanas, obradoiros, actividades acuáticas, praia, piscina e actividades multiaventura no camping de Cachadelos, en Sanxenxo. Unha estancia que combinaron con saídas a O Grove, ao seu acuario e ao miradoiro de Siradella.

Pola súa banda, a rapazada entre 12 e 16 anos desfrutaron de oito días dun Campamento de Mar no albergue xuvenil de Sinas, en Vilagarcía de Arousa. Ademais de visitar Vilanova e Vilagarcía, tamén realizaron unha ruta pola Illa de Arousa e actividades como pádel surf, kaiak, skim-bodyboard ou snorkel.

Os alcaldes de Boqueixón, Ovidio Rodeiro, e Vedra, Carlos Martínez, viaxaron ata Sanxenxo e Vilagarcía para saudar aos pequenos e comprobar que o desenvolvemento dos campamentos de verán foi completamente satisfactorio.