Doctor Snob protagoniza As Tardes do Alfar deste xoves nas Torres de Santa Cruz

Este xoves 10 de xullo continúa no parque das Torres de Santa Cruz a edición do microfestival As Tardes do Alfar, e faino cunha das bandas máis singulares e veteranas da escena galega: Doctor Snob, coñecidos polo seu son enérxico, letras afiadas e espírito comprometido. O concerto dará comezo ás 20h, nun espazo ao aire libre con entrada libre e
ambiente familiar.

Como é habitual, a tarde abrirase ás 19h cunha demostración de olería ao vivo da man do oleiro Alberto Añón, que converterá o parque nun espazo de creación artística e cultura tradicional, nunha experiencia única para todos os públicos.

En maio deste ano, Doctor Snob presentou o seu novo traballo discográfico, Donde arrecia el vendaval, un álbum coidado e potente, cheo de guitarras afiadas, melodías pegadizas e letras directas que homenaxean ao mellor rock clásico con toques de pop. Este novo disco reflicte a madurez e a paixón da banda tras máis de tres décadas nos escenarios, con temas como Por dirección prohibida ou Viejo Reloj, cargados de nostalxia e forza, e outros como ¿Quién se lo llevó? ou El mundo al revés, que desprenden unha potente enerxía rockeira.

En As Tardes do Alfar, Doctor Snob regresa a Oleiros, despois de ter pasado polo Rockanroleiros do ano pasado, para ofrecer un concerto no que reivindican a súa madurez musical e traen consigo todos estes novos temas, deixando que a boa música acompañe unha gran noite de verán no centro de Santa Cruz.