Noventa nenos e nenas participan durante todo o mes no campamento municipal gratuíto “Neda concilia”

O Concello de Neda poñía en marcha este luns o campamento de verán “Neda concilia. Con c de corresponsabilidade”. Trátase dun programa gratuíto, destinado a facilitar en xullo a conciliación ás familias do municipio. Un total de 90 nenas e nenos empadroados na localidade benefícianse desta proposta de lecer estival, cubrindo todas as prazas ofertadas.

As instalacións do CEIP San Isidro acollen o campamento municipal, que inclúe ao longo de todo este mes unha morea de actividades para todos os gustos, en horario de 8.45 e a 13.45 horas.

A concelleira de Igualdade, Ángeles Puentes, achegábanse esta mañá ao centro escolar para saudar aos participantes: nedenses de entre 3 e 12 anos, divididos en tres grupos, en función da idade.

O proxecto inclúe a diario actividades predeportivas, actividades creativas, talleres ambientais, propostas de promoción da igualdade, de alimentación saudable… e como sucedía en edicións anteriores, un día a semana, a rapazada desfrutará ademais de xogos acuáticos na piscina municipal.

Dende o Concello de Neda incídese na importancia deste servizo gratuíto, cofinanciado desta volta pola Consellería de Política Social e Igualdade, no marco do Plan Corresponsables, á hora de facilitar que as nais e pais de menores empadroados na vila poidan conciliar vida familiar e laboral neste primeiro mes das vacacións escolares, sen ter que sobrecargar aos avós e avoas. A aposta busca ademais evitar o sedentarismo dos máis novos durante o período non lectivo, fomentando o lecer activo.