Neda logra que Deputación da Coruña redobre o seu apoio económico á Festa do Pan

O Concello de Neda logra que a Deputación de A Coruña reforce o seu apoio á Festa do Pan que, como é tradición, terá lugar o primeiro domingo de setembro. A administración local acada unha subvención de preto de 27.000 euros para a XXXV edición da súa cita gastronómica, que atrae anualmente a milleiros de persoas á localidade.
Segundo consta na concesión definitiva das axudas a concellos de menos de 50.000 habitantes para a realización de actividades de promoción económica, Neda será, por segundo ano, un dos 26 municipios da provincia, que recibirá achegas para apoiar as súas Festas de Interese Turístico de Galicia.

O proxecto presentado polo municipio consegue da Deputación, presente tamén na cita a través da súa Rede Cultural, un total de 26.910,40 €, fronte aos algo máis de 14.000 euros da anterior convocatoria.
A aportación provincial permitirá reducir o coste que ten para as arcas locais a celebración, concibida para exaltar o produto estrela da gastronomía local, para reivindicar o excelente labor dos panadeiros e das panadeiras do municipio e recoñecer a importancia do sector na economía nedense.

A administración local ultima a programación cultural do certame que que, desta volta, coincidirá o día antes da patroa Santa María. A festa, como ven sendo habitual, completarase cunha nova edición de Noite de bolos, festival musical que se adiantará un día, pasando a ter lugar o venres 5 de setembro.