A Pobra iza a Bandeira Azul en Lombiña-Cabío, símbolo da calidade “ambiental e dos servizos” da praia

· A concelleira de Turismo, Estefanía Ramos, e o concelleiro responsable do servizo de socorrismo, Eloy Sobrido, procederon a izar, esta mañá, o distintivo.

A concelleira de Turismo, Estefanía Ramos, e o concelleiro responsable do servizo de socorrismo, Eloy Sobrido, procederon a izar, esta mañá, a Bandeira Azul na praia de Cabío-Lombiña. Trátase dun acto simbólico que, con todo, referenda a calidade “ambiental e dos servizos” do areal, tal e como explicaron ambos os edís.

A concelleira de Turismo incidiu en que o feito de contar con este distintivo, de relevancia a nivel internacional, “é froito do traballo de varios departamentos municipais e tamén da vontade política deste goberno, que quere seguir mellorando os nosos areais, un dos principais atractivos do municipio”. Pola súa parte, Sobrido explicou o funcionamento do servizo de socorrismo, dispoñible en Cabío desde o pasado 20 de xuño. Como comentou o edil, son cinco os profesionais que se encargarán destes labores ata o 15 de setembro, en horario de mañá e tarde. En todo caso, tal e como subliñou o concelleiro, “o resto de areais do municipio son seguros e dispoñen de dispositivos e elementos de seguridade”. Así, A Illa conta cun balizado de seguridade para os bañistas, un dispositivo que se pretende estender tamén na Corna.

Entre as prestacións dispoñibles en Cabío-Lombiña atópanse tamén o paseo marítimo, a zona de estacionamento, o parque infantil, os baños públicos, o restaurante e as empresas de actividades náuticas.

Ademais da Bandeira Azul, a de Cabío-Lombiña conta tamén co distintivo de calidade SICTED, un recoñecemento do que tamén poden presumir A Illa e Os Areos.