Neda pon en servizo a súa nova oficina de turismo

A instalación, situada xunto ao albergue de peregrinos, funcionará  a diario ata mediados de outubro

Neda abrir hoxe ao público a súa caseta de turismo, situada xunto ao albergue de peregrinos. A nova instalación localízase en pleno Camiño Inglés, unha ruta xacobea que está de moda, e atrae cada ano a milleiros de peregrinos á vila. O servizo municipal de recepción e atención aos visitantes estará operativo todos os días ata mediados de outubro.

O Concello estreaba este mediodía a pequena caseta, construída en madeira, na que, a partir de agora, prestará atención o persoal contratado, ao abeiro da subvención concedida pola Deputación da Coruña.

Neda contará con persoal especializado durante catro meses, co obxectivo de mellorar a acollida ao turista durante o verán, optimizando a información en destino sobre os principais puntos de interese (fervenza do Belelle, casco antigo de Neda, miradoiro de Ancos, festa do pan de Neda…) e tamén sobre a oferta cultural e de restauración locais.

Trátase pois dunha aposta por mellorar a experiencia das persoas que pasan pola localidade durante a tempada alta, buscando que queiran volver. Ademais, o servizo converterase, durante o tempo de apertura, no punto de recepción dos peregrinos que busquen información ou que queiran pernoctar na instalación turística local.