Inés Rey recibe a Juan Antonio Cuéllar, que hoxe tomou posesión do seu cargo como xerente do Consorcio para a Promoción da Música

O director e compositor colombiano inicia a súa etapa á fronte da xestión do Consorcio cun proxecto de desenvolvemento artístico, educativo e organizativo

A alcaldesa da Coruña, Inés Rey, acompañada polo concelleiro de Cultura, Gonzalo Castro, recibiu esta mañá no Palacio Municipal de María Pita a Juan Antonio Cuéllar, recentemente nomeado xerente do Consorcio para a Promoción da Música. A recepción institucional serviu como primeiro encontro co novo responsable da entidade que xestiona a Orquestra Sinfónica de Galicia e as súas agrupacións asociadas. Cuéllar, que hoxe tomou posesión do cargo, foi seleccionado mediante un proceso público que valorou o seu perfil profesional e o proxecto presentado, que propón unha folla de ruta de catro anos centrada na proxección internacional da OSG, a colaboración educativa e a mellora da estrutura organizativa e financeira do Consorcio.

Ao longo da súa carreira ocupou cargos de responsabilidade en institucións musicais de referencia como a Orquesta Sinfónica Nacional de Colombia, compaxinando a actividade artística coa docencia universitaria e o deseño de programas formativos. Tamén impulsou proxectos de desenvolvemento orquestral e participou en producións musicais de ámbito internacional.

Esta mañá, Juan Antonio Cuéllar foi recibido no Palacio Municipal de María Pita pola alcaldesa da Coruña, Inés Rey, e polo concelleiro de Cultura, Gonzalo Castro, nun encontro institucional que serviu como primeira toma de contacto tras a súa designación oficial. Hoxe mesmo o novo xerente celebrou tamén as primeiras reunións coa orquestra.