As persoas que desexen unirse ao séquito da Asociación Cultural O Castro da Fervenza poden solicitar un traxe no Departamento de Turismo de Boqueixón antes do venres
O Pico Sacro de Boqueixón acollerá un ano máis a Cerimonia do Lume Sagrado, paralizada durante a pandemia e que se recuperou o ano pasado. Así, este domingo 22 de xuño, ás 13:00 horas, o monte ilicino acollerá unha celebración celta encabezada pola raíña Alda e o seu séquito, que recuperará de forma simbólica a tradición dos nosos devanceiros na festa do solsticio de verán a través da obtención do lume sagrado directamente do Sol.
O acto contará coa colaboración da Asociación do Castro da Fervenza de Callobre (A Estrada) e coa actuación do grupo de música tradicional Son de Gaita, de Sergude. Ademais, todas as persoas que desexen participar activamente na cerimonia poden solicitar os traxes de época inscribíndose antes do venres 20 de xuño no Departamento de Turismo de Boqueixón, en boqueixonturismo@gmail.com ou chamando ao 981 513 061.
A celebración da cerimonia está condicionada á meteoroloxía. De feito, tras o parón provocado pola pandemia, esta tradición non puido celebrarse ata o 2024 debido a coincidir con fortes choivas. Ademais, todas as persoas que queiran recoller o lume sagrado para prender as súas fogueiras da noite de San Xoán, poderán levar unha candea ou un farol ao Pico Sacro para recoller o lume sagrado.
Deja un comentario
Lo siento, debes estar conectado para publicar un comentario.