Espazos singulares e emblemáticos da Coruña acollerán espectáculos teatrais este verán

O Concello e Noite Bohemia organizan os meses de xuño e xullo representacións abertas á cidadanía

O Concello da Coruña, en colaboración coa compañía de teatro Noite Bohemia, reforza a súa aposta pola cultura ao aire libre e a recuperación de espazos emblemáticos como escenarios teatrais. Durante os meses de xuño e xullo, a cidade transformarase nun escenario vivo, onde o teatro clásico e contemporáneo cobrarán protagonismo en recunchos de gran valor arquitectónico e patrimonial.
“Esta iniciativa, impulsada polo Goberno de Inés Rey, busca facer do arte dramático un elemento accesible para toda a cidadanía, consolidando a tradición de espectáculos ao aire libre que cultivaron éxito en edicións anteriores”, sinalou Gonzalo Castro, concelleiro de Cultura e Turismo. A programación deste verán non só levará o teatro a prazas históricas e lugares icónicos da cidade, senón que tamén volverá integrar o espazo único da praia de San Amaro, que acollerá unha nova edición da Mostra Internacional Area de Teatro (MIAT).

Desde o Castro de Elviña e o Castelo de San Antón ata a praza de Azcárraga e a praza das Bárbaras, A Coruña será testemuña de representacións que achegarán o teatro clásico a públicos de todas as idades. O proxecto, apoiado polo Concello da Coruña, ten como obxectivo consolidar o teatro ao aire libre como un aceno de identidade da cidade.

A excelente acollida do público en edicións anteriores garante a continuidade do programa como cita anual fixa.

Calendario de representacións

Todas as funcións celebraranse ás 21.30 horas, con entrada gratuíta ata completar capacidade.
 21 de xuño – Praza das Bárbaras: ‘La Casa de Bernarda Alba’, de Federico García
Lorca
 24 de xuño – Praza de Azcárraga (Cidade Vella): ‘Los Gemelos’, de Plauto (comedia clásica)
 13 de xullo – Castro de Elviña: ‘Edipo Rey’, de Sófocles
 20 de xullo – Castelo de San Antón: ‘Yerma’, de Federico García Lorca
Mostra Internacional Area de Teatro (MIAT) – Praia de San Amaro
A praia de San Amaro será escenario dunha programación internacional que incluirá espectáculos de improvisación e teatro contemporáneo ás 21:30 horas durante tres xornadas.
 4 de xullo – ‘Épica Vulgaris’, espectáculo de improvisación de Improversados
 5 de xullo – ‘Novecento’, de Ancoraxe Teatro
 6 de xullo – ‘A Nai’, de Amorodio Teatro