O Concello porá en marcha a semana que vén os traballos de mellora previstos no carreiro peonil da rúa Veramar, atendendo as solicitudes das veciñas e veciños

Tras recibir luz verde do servizo autonómico de Patrimonio, nos vindeiros días arrincarán as obras para remodelar esta superficie, onde se renovará o pavimento e se gañará unha nova área axardinada

Ao longo dos vindeiros días, o Concello porá en marcha as obras para mellorar a accesibilidade no carreiro peonil da rúa Veramar, un espazo que, pola súa configuración, entre bloques de vivendas residenciais, está concibido para as persoas viandantes.

A concelleira de Infraestruturas e Mobilidade, Noemí Díaz, apuntou que “as veciñas e veciños solicitaron renovar o pavimento tintado desta rúa, que polo paso do tempo e a súa progresiva erosión, foi experimentando deterioración. Agora, o que faremos será adaptala e incorporar aquí áreas verdes que ata agora non había”.

A rúa Veramar está incluída no ámbito do PEPRI, polo que, como é habitual nestes casos, foi preciso agardar a aprobación do servizo de Patrimonio da Xunta para acometer as melloras previstas. Estes días recibiuse luz verde para facelo, polo que o inicio dos traballos é inminente.

A renovación desta superficie suporá a disposición dun novo firme de formigón cunha zona central axardinada. Unha vez que se concreten as melloras, o carreiro pasará a contar con dúas franxas laterais de tres metros de ancho, concibidas para que por elas circulen os vehículos de emerxencias e tamén para o acceso da veciñanza aos portais das vivendas.
“E, por outra banda, co parterre central incrementamos a superficie de drenaxe. A rúa adaptarase para que a auga da choiva que caia sobre o pavimento circule cara á zona verde. Son detalles que a priori parecen pequenos, pero que suman, porque a incorporación destas áreas axardinadas e con vexetación onde antes non as tiñamos tamén é clave para contribuír a mitigar o cambio climático nas cidades, unha cuestión que forma parte dos compromisos asumidos polo Goberno de Inés Rey en materia medioambiental”, razoou Díaz.