O Concello de San Sadurniño organiza varias actividades para celebrar o Día do Orgullo

Tres obradoiros e un vídeopodcast compoñen a oferta municipal do 28X, para a que xa están abertas as inscricións

A Área de Igualdade do Concello de San Sadurniño celebra as diversidades sexuais e afectivas con motivo do Día Internacional dos Dereitos LGTBIQ+, máis coñecido como Día do Orgullo. Unha data para reivindicar a plenitude de dereitos de quen é libre de sentirse e amar como queira. Dereitos que, por certo, están véndose ameazados en todo o mundo polo rexurdir dos discursos de ultradereita que xa penetraron en moitos gobernos. Contra deles só cabe a educación e a concienciación en valores de tolerancia. Nese sentido, en San Sadurniño hai programados tres obradoiros en colaboración con O Castelo de Narahío, a Asociación Brío e Avante LGBT+ Ferrolterra. As inscricións están abertas a través do correo oriana.lopez@sansadurnino.gal ou do teléfono 695 876 178.

A primeira proposta terá lugar no local social da Veiga, en Naraío, o sábado 21 de xuño ás 11:00h, baixo o título “E iso de queer que é?”. Coa axuda da asociación Avante LGBT+ Ferrolterra e a colaboración da AVV O Castelo de Narahío organízase un entretido obradoiro de collages e fanzines no que aprender o significado de palabras como trans, travesti, transinclusivo, transexcluínte, heteronorma, xénero, etc. e tamén cales son as realidades ás que se refiren estes conceptos.

Ademais de parolar e intercambiar pareceres, as persoas participantes -preferentemente adolescencia, mocidade e adultas-, traballarán coa técnica do collage para facer unha pequena revista que, ao tempo, lles servirá para reflexionar sobre as súas propias identidades.

A seguinte cita do programa do Orgullo está fixada na axenda para o venres 27 de xuño ás 11:00h nos Xardíns municipais. A Asociación Brío volve colaborar nos actos co gallo do 28X para reivindicar tódolos xeitos diversos que existen de ser e sentir. Desta vez desenvolveranse dous obradoiros simultáneos para a rapazada máis pequena e para a que xa está entrando na adolescencia.

No primeiro, titulado “Abrindo a fiestra á diversidade”, as pequechas e pequechos de 3 anos en diante deseñarán adhesivos con debuxos con temática relacionada cos dereitos LGTBIQ+ para poder decorar fiestras, neveiras e calquera outro espazo da casa.

As nenas e nenos máis grandes, a partir de 8 anos, participarán no obradoiro “Camiñando cara á diversidade”. Pintarán unhas baldosas para facer un Camiño da Diversidade entre o carreiro central dos xardíns e a Árbore da Diversidade situada a uns metros.

Estes obradoiros creativos irán desenvolvéndose mentres a rapazada coñece coa axente de Igualdade conceptos básicos relativos á diversidade LGTBIQ+, “ademais de tomar conciencia de que os dereitos e a igualdade coa que contamos agora conseguíronse grazas á protesta e o esforzo de moita xente, malia que aínda quede moito por facer”, apunta a concelleira do ramo, Araceli Bellas Castro.

A concelleira incide en que estas accións “están pensadas como un xogo para traballar coas nenas e nenos aspectos como o respecto e a empatía. Valores que fan moita falta nos tempos actuais en que parece que a sociedade está retrocedendo en liberdades e no entendemento doutros xeitos de ser e de sentir”.

Xa o propio Día do Orgullo LGTBIQ+, o sábado 28 de xuño, as propostas municipais co gallo desta data trasládanse ás redes sociais, coa estrea ás 20:00h dunha nova entrega do videopodcast “Falando sen Cancelas.

A técnica de Igualdade, Oriana López Castiñeira, conversará con Lucía Vázquez Pérez, unha das fundadoras da asociación Mestas Cedeira!. Na parola, duns vinte minutos de duración, abordarán o asociacionismo LGTBIQ+ no rural, as actividades que organiza este colectivo para dinamizar a vida local e dar visibilidade ao seu movemento, “e que recursos temos ao noso alcance para coñecer mellor as realidades das persoas LGTBIQ+ que forman parte das nosas comunidades e coas que convivimos a diario”, resume López Castiñeira.

O episodio poderá verse na canle de Youtube do Concello de San Sadurniño e tamén nas páxinas municipais en Facebook -Concello de San Sadurniño e San Sadurniño en Igualdade-. Ademais, a estrea irá seguida nos días posteriores de varios reels con comentarios de Lucía Vázquez ao respecto dos temas tratados na conversa.