As Xubias de Arriba e a contorna do hospital de Oza, punto de partida das melloras en percorridos peonís previstas polo Concello

Tamén haberá actuacións no barrio de Monte Alto. Concretamente, nas rúas Curros Enríquez e Valencia

O Concello porá en marcha a semana que vén as obras para mellorar a accesibilidade e os itinerarios peonís entre a urbanización Praia de Lazareto e o hospital sanitario de Oza, nas Xubias de Arriba.

O plan de traballos, que arrincou este venres coa instalación das casetas e a delimitación dos puntos de actuación, permitirá reforzar a seguridade viaria nun percorrido que, tal e como lembrou a concelleira de Infraestruturas e Mobilidade, Noemí Díaz, “hai un tránsito habitual de residentes e tamén das persoas que van ás instalacións sanitarias ou ao campus universitario”.

Por iso, está previsto remodelar e mellorar varios dos pasos peonís da zona, así como a renovación do pavimento e a adaptación de diversos espazos onde os itinerarios de paso se interrumpen, ben pola pendente ou pola existencia de barreiras arquitectónicas, que serán suprimidas.

Tras as Xubias, actuacións en Monte Alto

As Xubias marcará o inicio dun plan de traballos que tamén chegará ao barrio de Monte Alto, onde o Concello actuará na rúa Curros Enríquez para mellorar a accesibilidade ás instalacións da Asociación Veciñal Atocha-Monte Alto, onde está previsto habilitar unha nova rampla de acceso no lateral do edificio, frecuentado pola veciñanza do barrio por contar, por exemplo, cunha biblioteca de uso público.

Ademais, tamén se elevará o paso peonil próximo ao edificio, de forma que a beirarrúa e a calzada do cruzamento estarán ao mesmo nivel, mellorando así a accesibilidade universal nun percorrido clave para o tránsito peonil, por dar acceso ao Campo de Marte.

Tamén se actuará na rúa Valencia. Pola súa configuración urbanística, o estreito das beirarrúas dificulta actualmente a accesibilidade das persoas con mobilidade reducida. Por iso formulouse que a rúa pase a estar disposta nun formato de plataforma única, coa calzada e a beirarrúa ao mesmo nivel e con pavimentos diferenciados, visibilizando así as zonas de paso.
O investimento do Concello no conxunto destas actuacións nas Xubias e Monte Alto será de 237.000 euros.