A mellor danza contemporánea de Galicia toma este sábado á tardiña a contorna do albergue de Neda

Coa atención posta no tempo, o Concello de Neda última os preparativos da segunda edición do seu festival “Neda en danza”. A iniciativa cultural traerá este sábado, a partir das 20 horas, ao Paseo marítimo de Xuvia, á altura do albergue de peregrinos, tres espectáculos de danza contemporánea de compañías galegas de primeiro nivel.

O cartel do evento, destinado de promocionar na rúa unha arte chea de disciplina e de paixón, aposta por mostrar diversidade de estilos e máis de enfoques. Con propostas ben diferentes.

O certame arrancará con “Alleo”, unha delicada peza do Colectivo Glovo (Esther Latorre e Hugo Pereira) que acumula recoñecementos e premios. Unha obra que xira ao redor da idea da atalaia. Tras ela chegará o mar calmo e embravecido de Raquel Ferradás e a súa “Mesura”, que xa pasou con éxito por outros escenarios da comarca.

Finalmente, o Colectivo DeXeito porá o broche de ouro coa súa recreación, a través da danza e o movemento, da catástrofe ambiental do Prestixe. Unha peza, “77.000” (alusión ás toneladas de cru vertidas polo petroleiro), que rende tributo ao voluntariado que axudou a limpar a costa galega. A obra obtivo o Premio á mellor peza en Diálogos Contemporáneos do Festival DZM de Cáceres 2024.

O Concello conta para Neda en danza co apoio da Rede cultural da Deputación da Coruña. En caso de chuvia, tal e como sucedeu o pasado ano, as distintas actuacións trasladaranse ao polideportivo do instituto Fernando Esquío, situado xusto ao lado das instalacións turísticas.