Belén do Campo anima a solicitar as axudas do programa EBici para mercar bicicletas eléctricas

― O prazo de usuarios para solicitar estas axudas está aberto ata o 13 de novembro do 2026 ou ata que se esgote o crédito

― As empresas interesadas en colaborar poderán seguir adheríndose a EBici ata finais de agosto do 2026

― A orde estará dotada con 1,7M€ e financia a compra de bicicletas novas con pedaleo asistido e bicicletas de man híbridas ou eléctricas para cadeiras de rodas

A delegada da Xunta, Belén do Campo, acompañada polo alcalde de Noia, Santiago Freire, visitou o establecemento MC Bikes Noia para animar a solicitar as axudas para mercar bicicletas eléctricas con pedaleo asistido ou bicicletas de man híbridas ou eléctricas para cadeiras de rodas. O prazo está aberto ata o 13 de novembro ou ata que se esgote o crédito en calquera dos establecementos asociados ao programa,. A delegada informou que serán os propios negocios adheridos os encargados de presentar estas solicitudes para concluír a compra.

A representante do Goberno galego explicou que esta nova convocatoria está dotada con 1,7 millóns de euros, distribuídos en dúas anualidades: 1 millón de euros en 2025 e 700.000 euros en 2026. Con esta iniciativa, preténdese contribuír a dinamizar o comercio local e estimular a economía dos pequenos establecementos. Ademais, lembrou que na xornada de hoxe conmemorase o Día Mundial da Bicicleta, unha xornada na que recoñece a singularidade, a lonxevidade e a versatilidade da bicicleta, que leva en uso dous séculos e que constitúe un medio de transporte sostible, sinxelo, alcanzable, fiable, limpo e ecolóxico.

Belén do Campo destacou a utilidade destas achegas xa que o importe destas subvencións parten do 50% do custo cun máximo de 500 euros con carácter xeral. As familias numerosas contarán cun 60% de desconto co máximo en 600 euros e no caso das familias numerosas de categoría especial ou as persoas con mobilidade reducida as axudas aumentan ata o 70% ou un máximo de 700 euros do custo da bicicleta ou dispositivo adaptado para cadeira de rodas.
A listaxe de establecementos asociados pódese consultar a través da páxina web https://ebici.xunta.gal da Dirección Xeral de Mobilidade e irase actualizando segundo avance o programa. Na comarca do Barbanza están adheridos 3 establecementos e a delegada animou a que se sigan unindo máis xa que compre recordar que o prazo dos establecementos para adherirse a EBici segue aberto, polo que poderán seguir sumándose ata o 31 de agosto do 2026

Poden adherirse calquera establecemento de Galicia que se dedique total ou parcialmente á venda de bicicletas e serán os encargados de presentar, de xeito electrónico, a solicitude de axuda para completar a compra.

Impulso da mobilidade sostible e saudable
O programa continúa a aposta que dende a Xunta se fai en prol da mobilidade alternativa. EBici busca incentivar o uso dun transporte sostible, integrador e saudable como é a bicicleta, especialmente na contorna urbana onde se atopa a meirande parte da poboación.

Con este tipo de medidas, o Goberno galego busca reducir o uso do vehículo particular nos desprazamentos da contorna urbana, desconxestionando os centros das cidades galegas e reducindo en consecuencia a contaminación ambiental e acústica.

Dende o seu inicio en 2022 ata o peche da última convocatoria en novembro do 2024, o Goberno galego destinou preto de 2,7 millóns de euros a EBici cos que se logrou mobilizar arredor de 8 millóns de euros en total. Con esta nova convocatoria xa serán 4,4 millóns de euros os fondos destinados dende a Xunta.

O éxito do programa reflexouse nas 167 entidades colaboradoras e nas 5.300 persoas beneficiadas por estas axudas, principalmente na contorna urbana, onde se concentra a meirande parte da poboación, das cales 1.582 foron da provincia da Coruña. En canto ás entidades adheridas 61 foron da provincia coruñesa.