O Concello presenta tres liñas de axudas á escolarización para o próximo curso

· Tres programas de bolsas buscan paliar o importante esforzo económico que as familias teñen que acometer en cada inicio do curso escolar.

O Concello de Bergondo, seguindo a súa política de apoio ás familias con fillos ou fillas en idade escolar, abriu recentemente o prazo de tres diferentes liñas de subvencións para axudar aos bergondeses e bergondesas no importante esforzo económico que supón cada ano o inicio do curso.

Por unha banda están as bolsas de préstamo de libros de texto, que complementan ao Fondo Solidario da Xunta de Galicia e que están dispoñible desde 3º de Primaria ata 4º de ESO. Esta bolsa pode solicitarse a través deste formulario ata o 27 de xuño.

Para non deixar descubertas as necesidades das familias con fillos ou fillas en idade escolar que cursen Educación Infantil ou 1º ou 2º de Primaria, o Concello pon en marcha outra liña de axudas que consisten na entrega de libros. No caso dos estudantes de Primaria, deberán solicitar a axuda para a adquisición de libros e material da Xunta; de non facelo, quedarán excluídos deste programa. As solicitudes deberán entregarse antes do 2 de xullo por Rexistro, ben presencialmente ou ben a través da sede electrónica.

Por último, o programa de axudas á compra de material escolar e libros, que está dirixido a todas as etapas educativas, achega entre 30 e 120 euros ás familias con menos ingresos. Os únicos requisitos son estudar nalgún dos centros públicos de Bergondo e non superar o límite de ingresos establecido nas bases. O prazo de presentación de solicitudes pecha o 2 de xullo e deberá presentarse a documentación a través do Rexistro municipal.

Cabe destacar que esta última liña si ten en conta o nivel de ingresos, mentres que as de préstamo e entrega de libros non teñen a renda como un requisito nunha clara aposta pola educación pública e gratuíta.

As persoas interesadas poden solicitar máis información no 981 791 252 ext. 7/ ext. 4, ou nos correos electrónicos cultura.deportes@bergondo.gal ou monica.mourin@bergondo.gal