Reserva de prazas para as escolas culturais e deportivas municipais do Concello de Fene 2025-26

As Concellerías de Cultura e Deportes abrirán o vindeiro 9 de xuño -para o alumnado matriculado no mes de maio´25, nas culturais, ou no mes de xuño´25, no caso das deportivas- o prazo de reserva de prazas para o vindeiro curso nas escolas de música (solfexo, piano e guitarra), piscina, pavillóns, kárate e judo. As solicitudes tramitaranse presencialmente no Pavillón da Xunqueira de luns a venres de 8.30 a 14.00 horas e os mércores do mes de xuño, tamén en horario de tarde, de 16.00 a 19.00 horas. O alumnado de Fene poderá realizar a súa reserva do 9 ao 20 de xuño e o de fóra de Fene ou de Fene terá de prazo do 23 de xuño ao 2 de xullo.

No momento de realizar a reserva de prazas, os/as usuarios/as deberán presentar: o carné de usuario e, no caso de querer domiciliar o pagamento trimestral da/s actividade/s, achegar un recibo do banco co IBAN e os 20 díxitos da conta.

Só poderá reservar praza o alumnado matriculado que non teña cotas pendentes de pagamento tanto deste curso coma de cursos anteriores. Ademáis, nesta convocatoria non se poderá solicitar cambio de actividade ou grupo. A reserva realizarase para a mesma escola, grupo e horario nos que se estivo matriculado/a neste curso, agás aquelas persoas que por idade ou por nivel cambien de grupo. Neste caso deberán escoller novo horario.

Segundo informan desde as Concellerías de Cultura e Deportes, as persoas que o desexen poderán facer a reserva dos demais membros da súa unidade familiar (se tamén estiveron matriculados/as nas escolas culturais ou deportivas) e de dúas persoas alleas á mesma (sempre e cando estas dúas persoas non queiran domiciliar o pagamento xa que, neste caso, deberá asinar o titular da conta).

Finalizado o prazo, se non se formalizou a reserva, as prazas non solicitadas quedarán libres para cambios ou para novas altas no período de matriculación do mes de setembro.

Pagamento de cotas renovación mensual: Os/As usuarios/as que opten por esta modalidade de pagamento terán que pagar a cota correspondente ao mes de outubro do 13 ao 26 de setembro. Deberán retirar o recibo no pavillón A Xunqueira nas mencionadas datas.

Domiciliación bancaria: Para domiciliar o pagamento, que será trimestral, haberá que cubrir a orde de domiciliación bancaria, o que implicará a matriculación na actividade para o curso 25/26. No caso de tramitar a baixa terán que facelo antes do comezo do curso.

CATEGORÍAS POR ANOS DE NACEMENTO NAS ESCOLAS DA PISCINA CURSO 25/26

Natación de bebés 2025 2024 2023

Natción 1ª infancia 2022 2021 2020

Iniciación infantil e perf. Infantil 2019 2018 2017 2016 2015 2014 2013

Perf. Xuvenil 2012 2011 2010 2009 2008

Adulto 2007 a 1961

3ª idade 1960 e antes