O pleno aprobou por unanimidade a proposta do goberno municipal que consiste na cesión dos terreos municipais precisos á beira da ría para que o Ministerio execute e remate o paseo da ría unindo os municipios de Oleiros e Cambre ademais da zona verde do Paraíso.
Desta maneira culmínanse as numerosas xestións e denuncias realizadas polo Goberno Municipal para reclamar a construción dos tramos de paseos inacabados e inconexos que, inicialmente, o Ministerio se negaba a executar; mais que finalmente serán unha realidade próxima.
O pleno do Concello de Oleiros acordou por unanimidade ceder os espazos precisos para a execución polo Ministerio das obras necesarias para finalizar o paseo da ría unindo os Concello de Oleiros e Cambre. Os traballos a realizar consisten en dar continuidade ao paseo marítimo pola marxe dereita da Ría do Burgo unindo os dous municipios: un tramo de 454m de paseo de 3m de ancho e 552m de carril bici.
Por outra banda, e respecto da zona do Paraíso, o Concello de Oleiros comprométese tamén, unha vez rematadas as obras, a facerse cargo do
mantemento da zona referida que representa 653,28 m². A solución proxectada para este caso consiste na demolición e reconstrución da parte superior dos muros existentes ata a cota dos paseos de borde onde se conectarán. Desta forma garantirase a non afección polas mareas nin polos efectos do cambio climático. Sobre o muro de borde de escollera executarase un paseo de 3m de ancho que será conectado coa senda xa existente no borde do noiro.
Deja un comentario
Lo siento, debes estar conectado para publicar un comentario.