“Chopo Saleiro” un novo evento gastronómico en Ribeira 

No día de hoxe presentouse esta nova cita gastronómica artellada pola asociación de hostalería Rúa do Sal que se celebrará o sábado 24 de maio na que se porá en valor o chopo como produto local. Veciños, veciñas e visitantes poderán degustar o cefalópodo de diferentes formas e a maiores solidarizarse cunha boa causa. 

Á presentación acudiron entre outros, a concelleira de Cultura, Antía Alberte, a tesoureira da asociación rúa do Sal, Lucía Lampón, o director de Xestión Nova Lonxa de Ribeira, Fernando Carreira, a secretaria da Confraría de Pescadores de San Pedro de Ribeira, Ana Belén. 

A concelleira de Cultura deu a benvida a esta nova cita gastronómica e resaltou a iniciativada asociación na que o concello colaborará coa amplificación do son, a publicidade e tamén coa achega do grupo de gaitas e pandeireiras -Airiños da Guía-, que amenizará a xornada. Alberte rematou salientando que “é unha primeira arrancada desta festa e desexamos que se consolide, que saia ben para poder facela os vindeiros anos”. 

Lucía Lampón, tesoureira da asociación e propietaria dun local da rúa do Sal informou que a tapa terá un custo de 5 euros e haberá tres tipos de preparacións, “arroz negro con chopo, empanada de chopo e o chopo guisado”. Os asistentes poderán desgustar a maiores a tapa de cortesía da casa que sempre é de balde. Lampón tamén quixo informar sobre o carácter social da iniciativa, o prezo da tapa, “unha parte do mesmo irá ás asociacións de animais, Callejeros Barbanza e Safe a Angel”, tamén indicou que se doará o excedente para a Residencia do Maior de Ribeira. 

Para finalizar a asociación agradeceu a implicación da Lonxa de Ribeira, Confraría de San Pedro, Peixes e Mariscos Bomar e o Concello de Ribeira.