A Reserva de Biosfera impulsa o seu primeiro plan de dixitalización para as súas empresas turísticas

• Mariñas Coruñesas realizará formación e asesoría individualizada para que os autónomos e pemes aproveiten os avances tecnolóxicos

• Os traballos están en licitación por 68.000 euros

O incremento da calidade turística vai da man da modernización tecnolóxica. Baixo esta filosofía, a Reserva de Biosfera Mariñas Coruñesas impulsa o seu primeiro gran Plan de Dixitalización dirixido á capacitación dixital do seu empresariado turístico.

O obxectivo é levar a cabo unha formación e asesorías individualizadas aos autónomos e pemes para que poidan incorporar as últimas tecnoloxías aos seus negocios. “A dixitalización pode transformar, para ben, ou día a día dunha empresa turística e desde a Reserva queremos proporcionar as ferramentas para logralo”, explica o presidente, José Antonio Santiso.

O plan estrutúrase en varias fases. A primeira centrarase na formación grupal. Para captar a atención dos participantes e evitar a sensación dunha formación tradicional, a Reserva aplicará un enfoque experiencial baseado na interacción e a gamificación. A formación combinará talleres dinámicos, retos en tempo real e demostracións prácticas nun formato atractivo e visual.

En canto a contidos, serán variados e adaptados á realidade de cada negocio. A creación de contido atractivo para unha rede social, a implementación de ferramentas de xestión dixital, a automatización de WhatsAPP Business ou a optimización da presenza en Googel MyBusiness son algúns dos exemplos.
A segunda fase avanzará a un diagnóstico individual e a realización de asesorías personalizadas. Neste punto, as accións propostas serán específicas para cada sector de actividade. Por exemplo, no caso da hostalería, poderanse abordar apartados como a simulación dun cliente misterioso dixital, a reputación en liña, ou como levar a cabo acciones promocionais tipo bonos de agasallo.
No caso dos aloxamentos, poderanse tratar temas como as reservas dixitais, a fidelización dos clientes a través de email márketing, ou a creación de contido atractivo para redes, entre outros. De forma similar actuarase coas empresas de agroturismo e as de actividades turísticas.

A terceira fase centrarase na consolidación das boas prácticas dixitais para cada empresa, deseñando un plan de acción personalizado con medidas concretas e ferramentas dixitais adecuadas á súa realidade. Neste punto implementaranse proxectos innovadores con experiencias concretas, dinámicas interactivas e temáticas diferenciadoras.
O plan inclúe tamén un apartado de formación dirixido aos técnicos e técnicas de turismo do territorio, así como aos membros das corporacións locais con competencias no ámbito.
Os traballos de execución deste plan atópanse en fase de licitación pública. O orzamento é de 68.849,03 euros e está enmarcado no Plan de Sustentabilidade de Mariñas Coruñesas, cofinanciado por fondos Next Generation.

O prazo de presentación de ofertas permanecerá aberto ata o próximo 20 de maio. Executarase desde a súa adxudicación ata xaneiro do 2026.
“Será un programa integral de dixitalización centrado na práctica e adaptado ás necesidades específicas dás entidades, cun enfoque experiencial, sostible e orientado a resultados tanxibles”, resume Santiso. O plan de Mariñas Coruñesas busca non só dixitalizar o destino, senón crear unha rede interconectada que fomente a diferenciación, reforce a sustentabilidade e facilite a comercialización de produtos e servizos do primeiro Destino de Ecoturismo certificado de Galicia.