Aos traballos na rede de saneamento municipal sumarase, proximamente, a construción da nova pista multideporte que se habilitará neste núcleo residencial da Coruña. O proxecto aprobouse a finais do ano pasado
O Concello completou esta semana as obras de mellora previstas na rúa Félix Rodríguez de la Fuente, na Urbanización Breogán, onde se remodelou a rede de recollida de augas pluviais, unha intervención que forma parte dos compromisos adquiridos polo Goberno de Inés Rey coas veciñas e veciños do distrito.
Ao longo destes últimos meses renovouse o circuíto de colectores que recollen as augas pluviais, que se integraron na rede separativa xa existente na zona. As novas tubaxes, soterradas, son de PVC e presentan diámetros variables, de 200 a 630 mm en función do treito, unha medida clave para reforzar a seguridade ante posibles fugas de augas.
A instalación dos novos colectores foi o paso previo ás melloras no firme da calzada de Félix Rodríguez de la Fuente, unha medida necesaria para facilitar o tránsito do tráfico rodado “e tamén para facer máis eficiente a drenaxe superficial, o que permitirá a evacuación de augas cara aos pozos”, tal e como explicou a concelleira de Infraestruturas e Mobilidade, Noemí Díaz.
Ademais, aproveitando a intervención, sobreeleváronse dous pasos peonís, unha medida orientada a fomentar a redución da velocidade do tráfico rodado nas rúas do núcleo residencial.
Esta iniciativa, que supuxo un investimento de 284.000 euros, levouse a cabo baixo un formato de cofinanciamento entre o Concello e a Deputación da Coruña, ao abeiro do Plan provincial de cooperación ás obras e servizos municipais (POS).
A Urbanización Breogán contará cunha pista multideporte
A alcaldesa, Inés Rey, lembrou hoxe que as actuacións previstas a curto e medio prazo na Urbanización Breogán inclúen a construción dunha nova pista multideporte, intervención á que o Concello destinará un investimento de case 300.000 euros.
Tal e como se informou a finais do ano pasado, cando se informou do proxecto á veciñanza, a pista permitirá practicar deportes como baloncesto, fútbol e voleibol, sexa de forma independente ou simultánea, e as instalacións tamén contarán cun peche perimetral e un moderno sistema de iluminación na súa contorna.
O proxecto, xa aprobado en Xunta de Goberno Local, prevé que esta nova instalación deportiva estea localizada nunha parcela de titularidade municipal na rúa Antonio Casares Rodríguez.
