O Día da Ciencia na Rúa 2025 celebrarase o sábado 10 de maio cun milleiro de persoas participantes

Nesta edición haberá, como novidade, un mercado gastronómico sostible no parque de Santa Margarida

O próximo do 10 de maio celebrarase o Día da Ciencia na Rúa 2025, unha iniciativa organizada polo Concello da Coruña, Asociación de Amigos da Casa das Ciencias e Cátedra Emalcsa-UDC. Ademais, tamén colaboran nesta xornada a FECYT (Fundación Española para a Ciencia e a Tecnoloxía – Ministerio de Ciencia, Innovación e Universidades) e a Deputación da Coruña. Daranse cita no parque de Santa Margarita ao redor dun milleiro de escolares, científicos e científicas que ofrecerán ao publico multitude de actividades e experiencias que conectan a ciencia e a tecnoloxía coa vida cotiá.
“Esta é unha das iniciativas máis especiais do ano para os centros escolares e desde o Goberno de Inés Rey queremos que así siga sendo, amosando a importancia da divulgación científica desde a mocidade”, sinala Gonzalo Castro, concelleiro de Cultura e Turismo. Nesta edición participarán 54 centros educativos da Coruña, Betanzos, Cambre, Carral, Arteixo, Cerceda, Culleredo, Coristanco, Oleiros, Ordes, Pontedeume, Outes, Ribadeo, Miño, Ortigueira, Baio, Ribeira e Poio. Entre as súas numerosas propostas hai actividades baseadas nas tecnoloxías máis actuais, como o recoñecemento facial con Intelixencia Artificial, a descrición do corazón mediante téxtiles electrónicos, invernadoiros intelixentes, un modelo de satélite artificial ou numerosas aplicacións de robótica. Tamén se presentarán experiencias que combinan a ciencia coa arte ou a maxia, ilusións ópticas ou o son, así como sorprendentes proxectos sobre a creación de nubes, o Sistema Solar, foguetes ou a observación de células e microorganismos ao microscopio. O amplo catálogo de actividades inclúe moitas relacionadas cos grandes temas de actualidade, como a crise climática, as conservación do medio ambiente e a sustentabilidade.

Xunto ao alumnado de todos os niveis educativos tamén participan profesionais da
investigación e a divulgación, que presentarán un diverso programa de contidos científicos para toda a cidadanía nos postos da Cátedra Emalcsa-UDC, a Facultade de Ciencias da UDC, a Escola de Enxeñeiros de Camiños da Universidade da Coruña, o Centro Interdisciplinar de Química e Bioloxía (CICA), o Centro de Investigación en TIC (CITIC), o Centro de Innovación Tecnolóxica en Edificación e Enxeñería Civil (CITEEC), a Unidade de Divulgación Científica e Cultural da UDC, o Centro Oceanográfico da Coruña, o Instituto de Investigacións Biomédicas da Coruña (INIBIC), o Servizo Municipal de Educación da Coruña, a asociación Luzada da USC, o Centro de Investigación e Tecnoloxía Matemática de Galicia (CITMAga), ou a Axencia Galega de Órganos e Sangue.

Tamén haberá numerosas actividades paralelas en torno ao edificio da Casa das Ciencias ofrecidas pola Asociación Galega de Xadrecistas-AGAX, a Agrupación Astronómica Coruñesa Ío, Bricolabs, Incude (Iniciativas Culturais e Deportivas universitarias), UDCiencia d+i, ademais dun concerto da Banda Municipal da Coruña ás 12.00 horas e un espectáculo de monólogos científicos da man de Ciencia Calidade a partir das 17.30 horas.

Ademais, como novidade nesta edición, haberá un mercado gastronómico sostible con 8 postos instalados na zona da entrada do parque pola rolda de Nelle.

Proxecto EduCO2Health

A Domus estará presente no parque de Santa Margarita cun proxecto Erasmus+, financiado pola Comisión Europea, denominado EduCO2Health, que inclúe unha proposta de actividades para coñecer que é o exposoma e que pegada deixa a contorna na nosa saúde. O concepto de exposoma implica estudar todas as exposicións acumuladas por unha persoa desde a concepción ata o final da súa vida, o que abarca non só os elementos externos, como a dieta, o estilo de vida e a contorna onde vivimos e traballamos, senón tamén factores internos como o metabolismo, a microbiota intestinal, a inflamación e o estrés oxidativo.

EduCO2Health está liderado pola Universidade de Santiago de Compostela e conta coa participación da Domus e outros socios de cinco países diferentes representando a institucións con experiencia nos ámbitos da xenética, a didáctica das ciencias, a comunicación científica, as artes plásticas, o ensino bilingüe e a ecoloxía.

Xornada de portas abertas nos Museos Científicos

Os Museos Científicos Coruñeses celebran este día cunha xornada de portas abertas nos seus tres centros, a Casa das Ciencias, a Domus e o Aquarium Finisterrae, en horario de 10 a 19 horas (último acceso ás 18.00 horas no Aquarium, ás 18.30 horas en Casa das Ciencias e Domus).
Para visitar o Aquarium Finisterrae será imprescindible realizar unha reserva de entradas, que poderá facerse cun máximo de 3 días de antelación nesta dirección: https://ticketing.coruna.gal/mc2/aq/
Para facilitar o acceso ás persoas maiores de 65 anos, estas poderán acceder sen reserva.

A visita á Casa das Ciencias e á Domus será libre, sen reserva previa, e sempre que a capacidade non estea completa. As persoas que queiran asistir a unha sesión de Planetario na Casa das Ciencias deberán retirar invitacións, que se repartirán media hora antes de cada sesión na recepción do museo, entregando un máximo de 2 invitacións por persoa. Haberá estas sesións:
● 11.00 horas | Directo: «Viaxe polo Sistema Solar… e máis alá!» (galego /a partir de 8 anos).
● 12.00 horas | «O ceo de Cloe» (galego / 4 – 7 anos).
● 13.00 horas | Directo: «El cielo de esta noche» (castelán /a partir de 8 anos).
● 16.00 horas | Directo: «Viaje por el Sistema Solar…y más allá!» (castelán /a partir de 8 anos).
● 17.00 horas | «El cielo de Cloe» (castelán / 4-7 anos).
● 18.00 horas | Directo: «O ceo desta noite» (galego /a partir de 8 anos).