O Concello de San Sadurniño reclámalle ao Consorcio a cobertura inmediata das prazas vacantes no Centro de Día

O alcalde de San Sadurniño, Secundino García Casal, remitiulle este martes unha carta ao Consorcio Galego de Servizos de Igualdade e Benestar para esixir a incorporación urxente das persoas en lista de agarda no Centro de Día. Segundo os datos dos que dispón o departamento municipal de Servizos Sociais, neste momento o servizo autonómico conta con 6 prazas libres e exactamente o mesmo número de persoas agardando para poder acceder ao recurso. O Concello considera inxustificable a demora na tramitación das altas.

O Concello de San Sadurniño solicitou formalmente ao Consorcio Galego de Servizos de Igualdade e Benestar que resolva “no prazo máis breve posible” a incorporación de seis persoas en lista de agarda ao centro de día municipal. Segundo o alcalde, Secundino García, esta situación resulta “inaceptable” tendo en conta que existen exactamente seis prazas vacantes no mesmo recurso.

“Mentres o Centro de Día de San Sadurniño conta con prazas vacantes, non se está procedendo á tramitación das altas necesarias para a incorporación das persoas que están na lista de agarda”, recóllese na carta remitida ao Consorcio. Desde o Concello aseguran que a situación se vén producindo nas últimas semanas e que xa foi detectada polos servizos sociais municipais.

O alcalde lembra que esta demora afecta directamente a persoas en situación de dependencia e tamén ás persoas coidadoras e familiares. “Solicitamos a resolución de alta que permita ás persoas de San Sadurniño en situación de agarda incorporarse coa máxima inmediatez a un recurso que lles resulta moi necesario”, subliña García no escrito.

O Concello expresou a súa comprensión ante a existencia de listas de espera derivadas do funcionamento habitual dos centros de día. Porén, tamén advirte que neste caso a existencia de prazas baleiras fai “incomprensible” que non se lles dea unha resposta inmediata ás persoas que están esperando. “É unha situación que non se debe producir, especialmente se temos en conta as necesidades das persoas solicitantes”, conclúe o rexedor.