O concurso de petiscos ‘Ortigueira a Bocados’ sorteará un vale de 100 euros entre o público participante

Nesta edición, que se celebrará do 9 ao 11 de maio, participarán os establecementos ‘Cafetería-Bar Ciclón’, ‘Manolo´s Xantar’, ‘Mesón Río Sor’ e ‘Ou Fogón Asiático’.

O Concello de Ortigueira pon en marcha a III edición do concurso de petiscos ‘Ortigueira a Bocados’, un evento gastronómico que cada ano atrae a veciños e visitantes co obxectivo de dinamizar o sector hostaleiro e promocionar a riqueza culinaria do municipio.

Nesta edición, que se desenvolverá do 9 ao 11 de maio, participarán os establecementos ‘Cafetería-Bar Ciclón’, ‘Manolo´s Xantar’, ‘Mesón Río Sor’ e ‘Ou Fogón Asiático’. Deste xeito, ofrecerán unha selección de petiscos orixinais e de alta calidade, deseñados especialmente para a ocasión e que terán un custo de 3 euros por tapa. Os asistentes poderán percorrer os distintos establecementos e degustar estas creacións, elaboradas con produtos de proximidade e co selo persoal de cada cociñeiro. Ademais, entre o público participante que valore e vote as súas propostas favoritas sortearase un vale de 100 euros.

O Concello de Ortigueira destaca a importancia deste concurso non só como unha oportunidade para apoiar á hostalería local, senón tamén como unha forma de impulsar o turismo gastronómico na zona. En edicións anteriores, o evento contou cunha gran acollida, converténdose nun referente para quen goza da boa mesa e buscan descubrir novos sabores nunha contorna única.
Desde o Concello convídase a todos os veciños e visitantes a sumarse a esta celebración gastronómica e a gozar do talento e creatividade dos hostaleiros de Ortigueira.