Ortigueira logra un remanente de case 3,5 millóns de euros grazas á xestión económica responsable do goberno local

O alcalde, Valentín Calvín, indica que “este remanente non é froito da casualidade, senón do traballo diario e dunha planificación rigorosa”.

O goberno municipal do Concello de Ortigueira, liderado polo alcalde Valentín Calvín, pechou o exercicio orzamentario de 2024 cun importante remanente de tesourería para gastos xerais que ascende a 3.489.368,99 euros. Este resultado será presentado proximamente no pleno da corporación, e pon de manifesto a eficacia dunha xestión caracterizada polo uso prudente dos recursos públicos e unha notable capacidade para atraer financiamento externo.
A liquidación do orzamento, que xa foi aprobada mediante resolución de Alcaldía, reflicte un balance saneado e equilibrado, cun resultado orzamentario axustado de máis de 1,9 millóns de euros. Este superávit alcanzouse sen comprometer a prestación de servizos nin os investimentos necesarios para o desenvolvemento do municipio, e supón unha marxe de manobra crave para afrontar novos proxectos e retos durante os próximos anos.
“Este remanente non é froito da casualidade, senón do traballo diario e dunha planificación rigorosa. Desde que asumimos o goberno local, propuxémonos xestionar con responsabilidade, optimizar cada euro e buscar activamente financiamento noutras administracións. Hoxe, os resultados aválannos”, declarou o alcalde Valentín Calvín.
Nun contexto no que moitas entidades locais enfrontan dificultades para cadrar as súas contas, Ortigueira posiciónase como un exemplo de estabilidade financeira. A capacidade do Concello para atraer transferencias correntes e de capital, así como o control do gasto corrente e financeiro, foi clave para alcanzar este saldo positivo. Así mesmo, o goberno local ha mantido un estrito seguimento do principio de estabilidade orzamentaria e da regra de gasto, tal como recollen os informes técnicos de Intervención.
“O obxectivo non é acumular remanentes, senón garantir que cada céntimo invístese en mellorar a vida dos nosos veciños e veciñas. Este colchón económico permitiranos afrontar con máis garantías novos proxectos, investimentos sostibles e melloras en infraestruturas, sen poñer en risco a saúde financeira do Concello”, engadiu o rexedor.
Con esta liquidación, o Concello de Ortigueira reafirma o seu compromiso cunha política económica responsable, transparente e orientada ao interese xeral. A xestión do equipo de goberno non só permitiu alcanzar unha situación financeira envexable, senón que tamén senta as bases para un futuro con maiores oportunidades para o municipio e os seus habitantes.
Calvín engade que “fronte a todos aqueles que auguraban a quebra do Concello, agora os datos avalan a nosa forma de xestionar. Durante meses tivemos que soportar acusacións infundadas de malgasto e mal uso dos fondos públicos por parte da oposición, que agora non ten máis que ver as contas, que non amenten”.