O Día do Deporte na Rúa celebrarase o 15 de xuño  con máis de 60 actividades deportivas abertas a toda  a cidadanía 

Está prevista a participación de case un cento de entidades deportivas na  contorna da Cidade Deportiva de Riazor 

O Concello da Coruña celebrará o domingo 15 de xuño o  XXXVIII Día do Deporte na Rúa, que suporá o colofón á actividade do curso 2024-2025 das  Escolas Deportivas Municipais. A cita ten como obxectivo promover as diferentes disciplinas  deportivas que se practican na cidade co obxectivo de promocionar os distintos clubs e  entidades deportivas dun xeito lúdico e participativo e achegarlle á cidadanía os beneficios  da práctica deportiva. 

O Día do Deporte na Rúa contará cun total de 60 disciplinas deportivas dispoñibles dende  fútbol, baloncesto, bádminton, ximnasia artística, taekwondo, escalada, marcha nórdica ou  boxeo. Tamén se inclúen deportes náuticos como wáter-polo, wíndsurf ou natación, entre  moitas outras. Todas as actividades se desenvolverán na contorna da Cidade Deportiva de  Riazor e, en paralelo, haberá deportes náuticos nas praias de Riazor e Orzán. 

Todas as actividades son de balde e abertas a todas as idades, e desenvolveranse en  horario de mañá. Como cada ano, case un cento de entidades deportivas sumaranse á  celebración deste Día do Deporte na Rúa, colaborando co Concello da Coruña co obxectivo  de dar a coñecer as diferentes prácticas deportivas que se ofertan na cidade e completar  unha programación ampla e diversa. 

“O Goberno de Inés Rey mantén o seu apoio ao sector deportivo da cidade achegando e  visibilizando o seu traballo entre a cidadanía e fomentando a práctica deportiva para todos  os gustos e idades, ofrecendo unha programación multidisciplinar e aberta ao público”,  sinalou Manuel Vázquez, concelleiro de Deportes.